Listasafn Borgarness var stofnað í tilefni af gjöf Hallsteins Sveinssonar (frá Eskiholti) til íbúa Borgarness, árið 1971. Hann gaf í upphafi 100 listaverk og bætti svo við þá tölu með árunum ásamt því að hann gaf rausnarlegar peningagjafir til safnsins, sem hefur dafnað og vaxið síðan. Í dag teljast listaverk safnsins vera um sjö hundruð.
Árið 2009 var listasalur Safnahúss nefndur Hallsteinssalur í minningu þessa velgjörðarmanns.
Verk úr eigu listasafnsins hanga uppi á opinberum stofnunum í Borgarnesi, en verk úr því eru einnig reglulega sýnd í Hallsteinssal auk þess sem unnið er með þau í safnfræðslu.
Hallsteinn Sveinsson (1903-1995) gaf listaverkasafn sitt til Borgnesinga árið 1971 og bætti all nokkru við þá gjöf síðar. Var það stofninn að Listasafni Borgarness sem í dag á hundruð verka. Safnið starfar í minningu Hallsteins og samkvæmt hugsjónum hans um veigamikið hlutverk listarinnar í þágu samfélagsins. Reglulega er sýnt úr safnkostinum, annars vegar með sýningum í Safnahúsi og hins vegar með því að leigja verk gegn vægu gjaldi til opinberra stofnana og fyrirtækja þar sem almenningur nær að sjá þau.
Sýningarsalur Listasafns Borgarness heitir Hallsteinssalur og er á efri hæð hússins. Hann er nefndur eftir listvininum Hallsteini Sveinssyni. Sjá má myndasafn hér ofar, helstu mál á salnum sjálfum með því að smella hér og mál á anddyri Héraðsbókasafns með því að smella hér. Listamenn nýta sér anddyrið oft til sýninga og einnig er möguleiki á minna svæði undir örsýningar.
Í salnum eru bæði byggða- og listsýningar. Hvað það síðarnefnda varðar er unnið í anda Hallsteins um mikilvægi listarinnar og að hún eigi að vera sem mest meðal fólks.
Menningarstefna Borgarbyggðar lögð til grundvallar í starfsemi Listasafns Borgarness. Þar er kveðið á um að sveitarfélagið styðji eins og kostur er við myndlistariðkun og miðlun, m.a. með því að leggja til húsnæði til sýninga. Einnig eigi að leitast við að opna leiðir fyrir íbúa til að njóta sín í listsköpun og að hvetja ungt myndlistarfólk til að kynna list sína.
Á sýningum er lagt er upp úr því að sýnd séu verk sem ekki hafa verið sýnd áður og að fyrir hendi sé tenging við starfssvæði Safnahúss, en það nær allt frá Haffjarðará í vestri til Hvalfjarðar í suðri.
Sýnandi greiðir ekki leigu af salnum en annast alfarið uppsetningu sýningar sinnar. Mælt er með neglingum í veggi frekar en að nota lausar festingar. Sýnandi sér um allt annað er viðkemur sýningunni sjálfri s.s. merkingar. Ef um sölusýningu er að ræða annast sýnandi þau mál. Sýnandi skilur við salinn eins og hann tók við honum og fjarlægir nagla eða skrúfur úr veggjum, en spörslun og málun á götum eftir slíkar festingar fer fram á vegum Safnahúss.
Ekki er greidd leiga fyrir sýningarsalinn. Ef aðstæður leyfa leggur Safnahús til hátíðardrykk og konfekt við opnun sýningar nema viðkomandi listamaður kjósi annað fyrirkomulag. Ef svo er annast hann veitingaþáttinn bæði er varðar aðföng, ílát og umsjón. Gestabók Safnahúss stendur til boða ef sýnandi notar ekki sína eigin gestabók.
Veggspjald til kynningar á sýningunni er unnið í Safnahúsi í samvinnu við viðkomandi listamann. Einnig er útbúin auglýsing fyrir héraðsmiðla og tengslanet Safnahúss nýtt til kynningar, svo og samfélagsmiðlar. Sé frekari kynningar óskað annast sýningaraðili það sjálfur í samráði við safnstjóra. Farið skal ávallt að gildandi sóttvarnarreglum.
Hentugast er að sýning sé sett upp sem næst opnunardegi og farið er fram á að öllum undirbúningi sé lokið í síðasta lagi kl. 18 síðasta virka dag fyrir opnun. Aðilum sem sýna í salnum eru kynntar ofangreindar upplýsingar og undirgangast þar með þau skilyrði sem þar eru sett.