Eftir slétta viku eða 1. ágúst hefst Unglingalandsmót UMFÍ í Borgarnesi. Von er á þúsundum gesta hvaðanæva að af landinu, ungmenni, fjölskyldur og ferðafólk. UMSB er gestgjafi mótsins í góðu samstarfi við Borgarbyggð. Keppt verður í 18 greinum en auk þess verða tónleikar, sýningar, sundlaugarpartý og margt fleira í gangi þar sem öll eru velkomin. Keppni og viðburðir fara ekki aðeins fram í íþróttahúsinu, sundlauginni og á Skallagrímsvelli heldur einnig í Hjálmakletti, golfvellinum að Hamri, Grillhúsinu, hestaíþróttasvæði Borgfirðings, Einkunnum, Hvanneyri, Skallagrímsgarði og víðar. Tjaldsvæði mótsins verður við Kárastaði og þar rís gríðarstórt skemmtitjald þar sem tónleikar og fleiri viðburðir fara fram.

Gríðarlega mikil undirbúningsvinna er að baki og stendur yfir, sem að mestu leyti er á herðum sjálfboðaliða. Allar upplýsingar um mótið, dagskrá og skráning keppenda og sjálfboðaliða er á heimasíðum UMFÍ og UMSB. Við hvetjum íbúa til að taka þátt og taka vel á móti gestum. Höfum huggulegt hjá okkur, skreytum og flöggum.