Skipulags- og byggingarnefnd Borgarbyggðar

1. Erindisbréf - Skipulags og byggingarnefnd

Erindisbréf skipulags- og byggingarnefndar lagt fyrir til umfjöllunar.

Skipulags- og byggingarnefnd leggur til við sveitarstjórn að samþykkja erindisbréf skipulags- og byggingarnarnefndar.

Samþykkt samhljóða.

2. Aðalskipulag - Endurskoðun vegna sameiningar sveitarfélaga

Fyrir liggur að Skorradalshreppur og Borgarbyggð hafa verið sameinuð í eitt sveitarfélag. Í gildi eru tvö aðalskipulög sem taka hvort um sig til landsvæðis fyrrum sveitarfélaga.

Skipulags- og byggingarnefnd leggur til við sveitarstjórn að hefja endurskoðun aðalskipulags hins sameinaða sveitarfélags skv. ákvæðum skipulagslaga nr.123/2010.

Nefndin lítur þannig á að við sameiningu sveitarfélaganna hafi orðið til ný stjórnsýslueining sem þarfnast sameiginlegrar og heildstæðrar stefnu um þróun byggðar og landnýtingar í nýstofnuðu sveitarfélagi. Núgildandi aðalskipulög voru unnin á mismunandi tímum, byggð á ólíkum forsendum og taka hvort um sig aðeins til þess landsvæðis sem tilheyrði fyrrum sveitarfélögum.



Jafnframt leggur skipulags- og byggingarnefnd til við sveitarstjórn að skipa vinnuhóp aðalskipulags með þátttöku kjörinna fulltrúa frá ólíkum svæðum sveitarfélagsins sem vinnur að heildstæðri stefnumörkun fyrir nýstofnað sveitarfélag.

Samþykkt samhljóða.

3. Fyrirspurn um skipulagsmál

Lögð er fram fyrirspurn um afstöðu Borgarbyggðar vegna strengvæðingarverkefnis. Þetta verkefni er hluti af áframhaldandi styrkingu raforkukerfisins í Borgarnesi, en Rarik hefur undanfarin ár í samvinnu við Borgarbyggð unnið að viðbrögðum við aukinni rafmagnsnotkun í bænum vegna tilkomu bílahleðslustöðva og annarar þjónustu, auk tíðra bilanna á svæðinu. Plægðir verða strengir frá Vatnshömrum að borgarfjarðarbrú, sem svo verða tengdir við strengi sem munu fara í borgarfjarðarbrú í framtíðinni.

Reynt verður eftir fremsta megni að fylgja núverandi legu lagna RARIKS og Veitna. Með því er ekki verið að raska nýjum svæðum.

Meðfylgjandi er loftmynd af þeirri leið sem plægð verður.

Skipulags- og byggingarnefnd tekur jákvætt í erindi RARIK um strengvæðingu til styrkingar raforkukerfisins í Borgarnesi en bendir á að sækja þurfi um framkvæmdaleyfi vegna framkvæmdarinnar með viðeigandi fylgigögnum, áður en framkvæmdir hefjast.

Bent er á að ef framkvæmdin snertir svæði sem njóta verndar samkvæmt lögum þarf að fara með málið samkvæmt þeim reglum sem um slík svæði gilda.

Samþykkt samhljóða.

4. Granastaðir - Umsókn um framkvæmdaleyfi

Lögð er fram umsókn um framkvæmdaleyfi vegna fyrirhugaðrar fergjunar og landmótunar á svæði við Granastaði í Borgarnesi (Tjaldsvæði), svæði A og B.

Fyrirhuguð framkvæmd felst í flutningi og útlagningar á jarðvegs/fyllingarefnis á afmörkuð svæði við Granastaði. Markmið framkvæmdarinnar er að hækka og jafna land, bæta aðstæður á svæðinu og undirbúa það fyrir uppbyggingu á tjaldsvæði. Fyllingarefni verður flutt á svæðið með vörubílum og jafnað út með vinnuvélum. Framkvæmdinni verður hagað þannig að rask verði takmarkað við skilgreint framkvæmdarsvæði og að afrennsli og aðliggjandi svæði verði fyrir sem minnstum áhrifum.

Skipulags- og byggingarnefnd tekur jákvætt í erindið en bendir jafnframt á að gerð var fornrannsókn á Granastöðum í júlí 2005 sem segir að gera þurfi ítarlegri rannsókn á svæðinu til að fá úr því skorið hvort þarna séu fornminjar. Skipulags- og byggingarnefnd felur skipulagsfulltrúa að fá úr því skorið hjá Minjastofnun Íslands hvort heimilt sé að veita framkvæmdaleyfi á því svæði sem umsókn nær til. Jafnframt felur nefndin skipulagsfulltrúa að fá úr því skorið hvar sé heimilt að framkvæma án þess að hætta sé á að fornleifar raskist.

Samþykkt samhljóða.

5. Skorradalsvatn Kirkjuvaðstangi - umsókn um framkvæmdarleyfi - 134057

Lögð er fram umsókn Orku náttúrunnar, rekstraraðila Andakílsvirkjunar dags. 14.08.2026. um framkvæmdaleyfi vegna könnunarskurða á athafnarsvæði Andakílsárvirkjunar við stíflumannvirkin við Skorradalsvatn. Verkefni er hluti að undirbúningi fyrir gerð fiskvegar á sama stað, en sótt verður um þá framkvæmd sér þegar öll gögn liggja fyrir. Framkvæmdin fer fram í sveitarfélaginu Borgarbyggð. Markmið verkefnisins er að kanna undirlag á fyrirhuguðu fiskvegsstæði. Könnunarskurðir verða grafnir eins og eins og teikning 3760097-DWG-DE-01 sýnir. Þeir verða fjórir talsins, um það bil 2 metra breiðir, 5 metra langir og 1-2 metra djúpir. Þar sem gróðurtorfur eru til staðar verða þær teknar ofan af og lagðar til hliðar og svo lagðar aftur ofan á skurðstæðin þegar búið er að fylla upp í könnunarskurðina að lokinni könnun. Gert er ráð fyrir að skurðstæðin verði grafin í ágúst/september 2026. Í aðalskipulagi er svæðið skilgreint sem athafnasvæði. Ekkert deiliskipulag er á svæðinu.

Skipulags- og byggingarnefnd leggur til við sveitarstjórn að samþykkja að taka til afgreiðslu framkvæmdaleyfi fyrir könnunarskurði á athafnarsvæði Andakílsárvirkjunar við stíflumannvirkin við Skorradalsvatn að undangenginni grenndarkynningu í samræmi við 44. gr. skipulagslaga 123/2010. Kynnt verður fyrir hagsmunaaðilum í gegnum skipulagsgátt og öðrum lögbundnum umsagnaraðilum.

Samþykkt samhljóða.

6. Umsókn um deiliskipulag - Dagverðarnes 62-65, svæði 8

Af fundi skipulags- og byggingarnefndar Skorradalshrepps nr. 201 þann 15. maí 2026.



"Málinu var frestað á síðasta fundi nefndarinnar þar sem farið var fram á lagfæringar á deiliskipulagstillögu skv. ábendingum nefndarinnar. Tillaga er aftur lögð fram til afgreiðslu, að beiðni landeiganda Dagverðarness. Um er að ræða 6,4 ha svæði fyrir neðan Skorradalsveg (508). Ekki er þörf á lýsingu skipulagsverkefnis þar sem allar megin forsendur deiliskipulags liggja fyrir í Aðalskipulagi Skorradalshrepps 2010-2022 og er í samræmi við stefnu aðalskipulagsins.

Skipulags- og byggingarnefnd leggur til við hreppsnefnd að samþykkja deiliskipulag frístundalóða Dagverðarness 62, 63, 64 og 65 á svæði 8 til auglýsingar sbr. 1. mgr. 41. gr. skipulagslaga nr. 123/2010. Skipulagsfulltrúa falið að vinna málið áfram."



Málið var ekki tekið til meðferðar hjá Hreppsnefnd Skorradalshrepps.

Skipulags- og byggingarnefnd leggur til við sveitarstjórn að samþykkja til auglýsingar tillögu að nýju deiliskipulagi fyrir Dagverðarnes 62-65, svæði 8. Lagður er fram uppdráttur dags. 17.04.2026. Málsmeðferð verður samkvæmt 41. gr. skipulagslaga nr. 123/2010.

Samþykkt samhljóða.

7. Umsókn um byggingaráform og byggingarleyfi Galtarholt

Skipulagsfulltrúi vísaði málinu til skipulags- og byggingarnefndar af fundi sínum nr. 79 þann 11. ágúst 2026.



Lögð er inn umsókn um byggingarleyfi fyrir 54,3 m2 frístundahúsi á einni hæð í Galtarholti 1 land (L191462). Lóðin er 30,4 ha og er þar fyrir 15 m2 geymsla, 10 m2 smáhýsi og 20 feta gámur/verkfærageymsla sem til stendur að klæða að utan með panel. Ekkert deiliskipulag er á svæðinu. Lóðin er skilgreind sem landbúnaðarland í flokki II í aðalskipulagi.

Skipulags- og byggingarnefnd bendir á að samkvæmt Aðalskipulagi Borgarbyggðar 2025-2037 segir að forðast skuli að byggja stök hús á víðavangi og að byggja skuli í tengslum við bæjartorfur. Heimilt er að byggja til fastrar búsetu á landi sem að jafnaði er 3 ha eða stærra. Heimilt er að byggja eitt íbúðarhús og gestahús, auk bygginga til landbúnaðarnota.

Í ljósi þess felur nefndin byggingafulltrúa að yfirfara þær byggingar sem fyrir eru á jörðinni áður en byggingaleyfi er veitt.

Samþykkt samhljóða.

8. Brekkuland/Skáli 134775 - Umsókn um byggingarheimild eða -leyfi - Flokkur 1,

Skipulagsfulltrúi vísaði málinu til skipulags- og byggingarnefndar af fundi sínum nr. 78 þann 9. júlí 2026.



Lögð er inn umsókn um byggingarleyfi fyrir viðbyggingu sem tengir saman tvo sumarbústaði og breyta húsinu í einbýlishús á lóðinni Vanaheim í Borgarbyggð (L237771). Húsið verður alls 190 m². Einnig er sótt um að byggja 88 m² bílskúr sunnan við einbýlishúsið. Byggingarmagn verður í heild 278 m². Ekkert deiliskipulag er á svæðinu. Í aðalskipulagi er svæðið skilgreint sem verslunar- og þjónustusvæði þar sem heimilt er að vera með fasta búsetu. Frekari uppbygging er heimil.

Skipulags- og byggingarnefnd samþykkir að grenndarkynna byggingarleyfið fyrir hagsmunaaðilum í samræmi við 44. gr. skipulagslaga nr. 123/2010. Kynnt verði í gegnum skipulagsgátt fyrir eigendum Jötunheim, Hraunbæjar og Birkihrauns 7,8 og 9.

Nefndin bendir á að deiliskipuleggja þurfi svæðið áður en af frekari uppbyggingu verður.

Samþykkt samhljóða.

9. Fyrirspurn um skipulagsmál - Trönubakki 1

Lögð er fram fyrirspurn um heimild til að byggja 68m² bílgeymslu á vestur enda lóðarinnar Trönubakki 1.

Svæðið er skilgreint sem frístundabyggð í aðalskipulagi. Ekkert deiliskipulag er á svæðinu.

Á loftmynd sem fylgir af fyrirhugaðri staðsetningu bílgeymslunnar er ljóst að hún er nær lóðamörkum en 10m.

Skipulags- og byggingarnefnd bendir á að samkvæmt Aðalskipulagi Borgarbyggðar er lögð áhersla á að frístundabyggð sé deiliskipulögð í heild áður en til uppbyggingar kemur.

Að mati nefndarinnar þarf að vinna nýtt deiliskipulag fyrir svæðið í heild þannig að unnt sé að meta áhrif breytinganna á landnotkun, byggðarmynstur, innviði, umferð, þjónustu og umhverfi áður en afstaða er tekin til frekari uppbyggingar.

Samþykkt samhljóða.

10. Stráskógarbyggð 1 - Umsókn um byggingaráform og byggingarleyfi

Skipulagsfulltrúi vísaði málinu til skipulags- og byggingarnefndar af fundi sínum nr. 77 þann 16. júní 2026.



Lögð er inn umsókn um byggingarleyfi fyrir viðbyggingu við sumarhús að Stráskógarbyggð 1 (L135125) í landi Stóra-fjalls og Túns í Borgarbyggð. Á lóðinni er 27,6 m² sumarhús og er sótt um byggingarleyfi fyrir 113,8 m² viðbyggingu. Sumarhúsið verður eftir stækkun 141,4 m². Deiliskipulag er á svæðinu þar sem heimiluð eru 40-50 m² sumarhús með allt að 10 m² útigeymslu. Hús stærri en 60 m² séu ekki leyfð. Svæðið er skilgreint sem frístundabyggð í aðalskipulagi.

Skipulags- og byggingarnefnd bendir á að fyrirhuguð framkvæmd er talsvert umfram gildandi deiliskipulag. Auk þess bendir nefndin á að samkvæmt Aðalskipulagi Borgarbyggðar 2025-2037 skuli eldri deiliskipulög endurskoðuð eftir atvikum svo þau samræmist lögum og reglugerðum.

Deiliskipulagið sem í gildi er á svæðinu er að mati nefndar orðið úrelt og fer fram á að landeigandi uppfæri skipulag svæðisins.

Samþykkt samhljóða.

11. Sólbakki 11 - Umsókn um stöðuleyfi

Skipulagsfulltrúi vísaði málinu til skipulags- og byggingarnefndar af fundi sínum nr. 78 þann 9. júlí 2026.



Lögð er inn umsókn um stöðuleyfi fyrir bráðabirgðar geymslu. Um er að ræða gámatjald sem fest er á milli tveggja gáma. Ætlunin er að setja upp þetta tjald norðan við húsið að Sólbakka 11 (L135803). Mun það ná allt að 15 metrum frá húsinu og verður þá minnst 5 - 6 metrar að lóðarmörkum næstu lóðar. Fyrir á lóðinni er 548 m² iðnaðarhús. Ekkert deiliskipulag er á svæðinu. Lóðin er skilgreind sem iðnaðar- og athafnalóð og er svæðið skilgreint sem iðnaðarsvæði í aðalskipulagi.

Skipulags- og byggingarnefnd tekur jákvætt í erindið og felur byggingafulltrúa að gefa út stöðuleyfi.

Samþykkt samhljóða.

12. Erindi til sveitarstjórnar vegna Rammaáætlunar

Lagt fram erindi sem barst Borgarbyggð vegna 6. áfanga rammaáætlunar en þar er kallað eftir almennri umsögn sveitarfélagsins vegna vindorkuhugmynda á Alviðru í Borgarbyggð sem og Sólheimum, sem yrði með staðsetningu í Dalabyggð.

Skipulags- og byggingarnefnd felur skipulagsfulltrúa að gera drög að svari við erindinu í samræmi við umræður á fundinum og leggja fyrir sveitastjórn.

Samþykkt samhljóða.

13. Afgreiðslufundur skipulagsfulltrúa - 79

14. Afgreiðslufundur byggingarfulltrúa - 262

15. Afgreiðslufundur byggingarfulltrúa - 263