Fundargerð
Sveitarstjórn sameinaðs sveitarfélags Borgarbyggðar og Skorradalshrepps
1. fundur
4. júní 2026 kl. 16:00 - 17:06
í fundarsal að Digranesgötu 2
Nefndarmenn
Starfsmenn
Samkvæmt 2. mgr. 12. gr. sveitarstjórnarlaga nr. 138/2011 skal sá fulltrúi í nýkjörinni sveitarstjórn sem á að baki lengsta setu í sveitarstjórn boða til fyrsta fundar sveitarstjórnar. Davíð Sigurðsson hefur lengstan starfsaldur sveitarstjórnarmanna og stýrir fundi fram að kjöri forseta sveitarstjórnar.
Starfsaldursforseti leggur til við sveitarstjórnarfund að samþykkja breytingar á dagskrá fundarins frá því til hans var boðað. Óskað er eftir að bætt verði inn 5 málum þ.e.
Undir dagskrárlið 8 kemur inn mál nr. 2606011, Kosningar í ráð og nefndir 2026-2030. Skipun í fræðslunefnd
Undir dagskrárlið 17 kemur inn mál nr. 2606027, Reglur um tölvubúnaðar sveitarstjórnarmanna 2026-2030.
Undir dagskrárlið 18 kemur inn mál nr. 2606025, Ráðningarsamningur sveitarstjóra 2026-2030.
Undir dagskrárlið 19 kemur inn mál nr. 2606047, Framlögð skilaskýrsla undirbúningsstjórnar um sameiningu Borgarbyggðar og Skorrdalshrepps
Undir dagskrárlið 20 kemur inn mál nr. 2606048, Reglur og gjaldskrár í sameinuðu sveitarfélagi Borgarbyggðar og Skorradalshrepps
Undir dagskrárlið 21 kemur inn mál nr. 2606049, Umboð til handa fyrrum oddvita sveitarstjórnar Skorradalshrepps
Dagskrá
1. Sveitarstjórnarkosningar 2026
2. Kosning forseta og varaforseta sveitarstjórnar 2026
Kosning forseta sveitarstjórnar:
Framlögð tillaga um að forseti sveitarstjórnar til eins árs verði Jovana Pavlovic
Kosning 1. varaforseta sveitarstjórnar:
Framlögð tillaga að 1. varaforseti sveitarstjórnar til eins árs verði Sigurður Guðmundsson
Kosning 2. varaforseta sveitarstjórnar:
Framlögð tillaga um að 2. varaforseti sveitarstjórnar til eins árs verði Haukur Þór Hauksson
3. Málefnasamningur D-lista og A-lista um stjórn Borgarbyggðar 2026-2030
Sonja Lind Eyglóardóttir lagði fram eftirfarandi bókun fyrir hönd fulltrúa B-lista í sveitarstjórn: "Í málefnasamningnum eru sett fram metnaðarfull markmið fyrir sveitarfélagið. Hins vegar vekja nokkur atriði spurningar um framkvæmd, forgangsröðun og fjármögnun þar sem þau eru almennt orðuð og erfitt er að átta sig á hvert sé að fara. Ekki koma fram skýr verk eða aðgerðaáætlun þannig að hægt sé að átta sig á hvert nýr meirihluti stefnir.
Sveitarfélög hafa takmarkað fjármagn og eitt af meginhlutverkum sveitarstjórnar er að forgangsraða lögbundnum verkefnum áður en farið er í ólögbundin verkefni. Þetta er sérstaklega mikilvægt í umræðu um málefnasamning þar sem mörg atriðin eru sett fram sem almenn markmið án þess að fjallað sé um kostnað eða forgangsröðun.
Það sem er sameiginlegt með mörgum atriðum samningsins er að þau eru jákvæð og auðvelt er að taka undir þau. Hins vegar eru markmiðin víða mjög almenn og skortir skýra forgangsröðun, tímasetningar, kostnaðarmat og mælanleg viðmið. Til að sveitarstjórn og íbúar geti metið árangur meirihlutans þarf að útfæra betur hvernig markmiðunum verður náð, hvaða fjármunir verða lagðir til og hvernig árangur verður metinn á kjörtímabilinu.
Í þessum málaflokkum eru sett fram markmið sem flestir geta tekið undir.
Áskorunin er hins vegar sú að samningurinn segir lítið um framkvæmdina. Víða er talað um að „efla“, „styrkja“, „auka“ og „móta stefnu“, en sjaldan er útskýrthvað eigi að gera,
hvenær það eigi að gerast,
hvað það muni kosta,
og hvernig árangur verði metinn.
Sveitarfélagið ber lögbundna ábyrgð á meðal annars:
grunnskólum,
félagsþjónustu,
þjónustu við fatlað fólk,
skipulagsmálum,
ákveðnum þáttum öldrunarþjónustu,
barnavernd og velferðarmálum.
Þetta eru verkefni sem sveitarfélagið verður að sinna og fjármagna óháð pólitískum áherslum hverju sinni. Á sama tíma eru mörg þeirra atriða sem nefnd eru undir menningu, samfélagsmálum og ýmsum þróunarverkefnum að mestu leyti ólögbundin verkefni. Þau geta verið mikilvæg og verðmæt, en þau verða ávallt að víkja fyrir lögbundinni þjónustu ef fjárhagsleg staða sveitarfélagsins krefst þess.
1.
Stjórnsýsla og fjármál.
Undir liðnum stjórnsýsla og fjármál er kveðið á um að sveitarfélagið verði rekið með ábyrgum, gagnsæjum og sjálfbærum hætti. Þó er þetta markmið orðað mjög almennt og því óskar sú sem hér stendur eftir nánari skýringum á því hvernig á að tryggja aukið gagnsæi umfram það sem þegar er lögbundið.
Telur nýr meirihluti að skort hafi á gagnsæi hingað til og þá í hvaða atriðum? Jafnframt er óskað eftir upplýsingum um hvaða mælikvarðar verða lagðir til grundvallar við mat á því hvort rekstur sveitarfélagsins teljist raunverulega sjálfbær.
Þá kemur fram að fjárfestingar skuli taka mið af skuldaþoli og langtímafjárhagsáætlun. Það er í eðli sínu lögbundinn grundvallarþáttur í ábyrgri stjórnsýslu og því er óskað eftir nánari upplýsingum um hvaða framkvæmdir eru fyrirhugaðar á tímabilinu, hver er forgangsröðun stærri verkefna? Og telur nýr meirihluti að þetta hafi skort á þetta hjá fráfarandi sveitarstjórn?
Einnig er rætt um góða upplýsingagjöf til íbúa, en ekki kemur fram með hvaða hætti hún á að batna né hvaða annmarkar eru á núverandi fyrirkomulagi. Telur meirihlutinn að skort hafi á upplýsingagjöf til íbúa síðustu ár, og þá með hvaða hætti? Óskað er eftir svörum um hvort meirihlutinn hyggist setja ný viðmið um upplýsingagjöf eða koma á reglubundnum upplýsingafundum til íbúa.
Varðandi stafræna þjónustu og einföldun samskipta við íbúa og fyrirtæki er ljóst að slíkar breytingar geta verið jákvæðar en unnið hefur verið markvisst og fjárfest í þessum þáttum undanfarin ár. Því er óskað eftir upplýsingum um hvaða stafrænu þjónustu er fyrirhugað að efla, hver áætlaður kostnaður er og hvernig forgangsröðun verkefna verði háttað.
Að lokum er kveðið á um virkt samráð við íbúa um stærri ákvarðanir og framkvæmdir. Óskað er eftir skýringu á því hvað telst til „stærri ákvarðana“, hvort samráðið verði bindandi eða einungis ráðgefandi og hvort hér sé um að ræða aukið samráð umfram það sem þegar er lögbundið, og þá með hvaða hætti það verði útfært í framkvæmd. Vill meirihluti Sjálfstæðisflokks og Borgarbyggðarlista setja á aukið íbúasamráð umfram lagaskyldur eða íbúakosningar á kjörtímabilinu?
2.
Fræðslu og uppeldismál
Undir kafla um fræðslu- og uppeldismál er tekið fram að sveitarstjórn hyggist áfram tryggja leikskólapláss frá 12 mánaða aldri líkt og gert hefur verið síðustu ár. Það er gott að vita að meirihlutinn hyggist halda áfram á þessari leið enda eitt af því sem barnafjölskyldur horfa til þegar hugað er að búsetu
Kaflinn er að öðru leyti fremur stuttur og almennt orðaður og því er óskað eftir nánari útfærslu á stefnu sveitarfélagsins í þessum málaflokki. Sérstaklega er óskað eftir upplýsingum um hvort og hvernig sveitarstjórn hyggist bregðast við þörf fyrir uppbyggingu og stækkun skólahúsnæðis, meðal annars Grunnskólans í Borgarnesi, á næstu misserum og hvort ekki hefði verið eðlilegt að kveða skýrar á um uppbyggingu leik- og grunnskóla og forgangsröðun í þeim efnum í málefnasamningi.
Þá er vísað til þess að hafa hagsmuni fjölskyldna að leiðarljósi, sem er jákvæð yfirlýsing en jafnframt mjög óljós. Óskað er eftir skýringum á því hvernig þetta markmið mun birtast í raunverulegum aðgerðum, ákvörðunum og fjárveitingum sveitarfélagsins. Hvernig ætlar meirihlutinn að setja hagsmuni fjölskyldna að leiðarljósi umfram það sem gert er er varðar fræðslu- og uppeldismál?
Varðandi áherslu á að efla snemmtæka íhlutun og sérfræðiþjónustu í skólum er um mikilvægt markmið að ræða en ljóst er að víða skortir sérfræðimenntað starfsfólk á þessu sviði. Hvernig hyggst meirihlutinn manna slíka þjónustu? Er gert ráð fyrir ráðningu fleiri sérfræðinga, fjölgun stöðugilda í skólum sveitarfélagsins, auknu fjármagni til úrræða og hversu mikil aukning á fjármagni er fyrirhuguð í þennan málaflokk?
Þá er lögð áhersla á að styrkja læsi og íslenskukunnáttu barna og ungmenna, sem er mikilvægt markmið í ljósi þróunar undanfarinna ára og hæstvirtum mennta- og barnamálaráðherra Ingu Sæland er mjög umhugað um.
Óskað er eftir skýringum á því með hvaða hætti meirihlutinn hyggst ná þeim árangri að styrkja læsi og íslenskukunnáttu barna, er fyrirhugað að leggja aukið fjármagn til íslenskukennslu, hvort fara eigi í verkefni umfram það sem kveðið er á um í aðalnámskrá og hvaða aðferðir eða verkefni verði notuð til að ná settum markmiðum?
Það er mikilvægt að fá fram hvaða leiðir meirihlutinn hyggst fara til að efla læsi og íslenskukunnáttu. Er það með auknu fjármagni og fjölgun stöðugilda, eða ætlið þið að fá ömmu Ingu til að koma og lesa fyrir börnin?
Þá er jafnframt óskað eftir skýringum á því hvernig árangur á þessu sviði verði mældur og metinn. Í þessu samhengi hélt Borgarbyggðarlistinn því fram í kosningabaráttunni að kaupa ætti fleiri bækur í skólabókasöfn. Ég hef ekki orðið var við skort á bókum, þar sem nú þegar er almennt talið að skólasöfn sveitarfélagsins standi vel að vígi.
Þá er fjallað um að efla forvarnir gegn einelti, ofbeldi og fíkn, sem eru umfangsmikið og mikilvægt verkefni. Óskað er eftir skýringu á því hvort með þessari stefnu sé verið að boða ný úrræði, aukið fjármagn eða styrkingu á núverandi kerfum, og með hvaða hætti þessi áhersla verði útfærð í framkvæmd.
Að lokum er tekið fram að tryggja eigi áframhaldandi öflugt starf háskóla og annarra menntastofnana á svæðinu. Þar sem sveitarfélög hafa takmörkuð bein áhrif á rekstur háskóla, sem að stærstum hluta eru fjármagnaðir af ríkinu, er óskað eftir nánari skýringum á því hvaða hlutverki sveitarfélagið telur sig geta gegnt á þessu sviði.
Jafnframt er óskað eftir upplýsingum um hvernig sveitarstjórn hyggst í reynd tryggja áframhaldandi öflugt starf háskóla og annarra menntastofnana á svæðinu og með hvaða hætti það verður gert í framkvæmd.
3.
Velferðarmál.
Undir kafla um velferðarmál vekur athygli að í meginatriðum er fjallað um lögbundin verkefni sveitarfélagsins. Því vaknar sú spurning hvort um sé að ræða nýja stefnumótun eða einfaldlega staðfestingu á því að sveitarfélagið hyggist áfram sinna þeim skyldum sem þegar eru lögbundnar.
Aðgengileg félagsþjónusta er lögbundið verkefni sveitarfélaga, þjónusta við fatlað fólk byggir á skýrum lagaramma og starfsemi í samræmi við Samning Sameinuðu þjóðanna um réttindi fatlaðs fólks er þegar hluti af lögbundnum skyldum sveitarfélagsins. Af þessum sökum er óskað eftir skýrari upplýsingum um hvað eigi að breytast frá núverandi stöðu, hvaða nýju aðgerðir eru fyrirhugaðar og hvað felist í raun í þeirri stefnumótun sem kynnt er?
Þó er ánægjulegt að sjá áherslu á velferð og félagslega þjónustu, en mörg markmið kaflans eru sett fram sem almennar yfirlýsingar án þess að skýrt sé hvernig þeim verði náð í framkvæmd.
Varðandi markmiðið um að tryggja öfluga og aðgengilega félagsþjónustu fyrir alla íbúa er það jákvætt en jafnframt mjög víðtækt. Óskað er eftir skýringum á því hvort allir íbúar sveitarfélagsins muni eiga rétt á félagsþjónustu, líkt og orðað er í málefnasamningnum, hvernig þjónustan verði efld frá núverandi stöðu, hvaða atriði núverandi þjónustu teljist ófullnægjandi og hvort fyrirhugaðar séu auknar fjárveitingar, fjölgun stöðugilda eða breytingar á þjónustufyrirkomulagi til að ná fram settum markmiðum.
Þá er lagt til að mótuð verði stefna um þjónustu við eldri borgara. Slík stefnumótun er eðlileg, síðasta stefna gilti fyrir árin 2015?2018 og tími til kominn til að uppfæra stefnuna. Á síðasta kjörtímabili voru tekin mörg mikilvæg skref í þessum málaflokki, meðal annars með Móma-teymi, heilsueflingu, heimsendingu á mat, ferðaþjónustu aldraðra og þátttöku í verkefninu „Gott að eldast“, þar sem sveitarfélagið hefur verið leiðandi á landsvísu.
Í því ljósi er óskað eftir því hvaða áskoranir meirihlutinn telur nú brýnastar í málefnum eldri borgara og hvaða breytingar eða nýjar áherslur eru fyrirhugaðar frá því sem nú þegar hefur verið gert?
Einnig er kveðið á um að móta stefnu um velferðarþjónustu í samræmi við Samning Sameinuðu þjóðanna um réttindi fatlaðs fólks og gildandi lög. Þar sem sveitarfélögum ber nú þegar að starfa samkvæmt gildandi lögum og alþjóðlegum skuldbindingum Íslands er óskað eftir nánari skýringum á því hvað felist í þessari stefnumótun umfram lagaskyldu?
Staðreyndin er sú, þrátt fyrir góðan vilja, að innleiðing samningsins hefur verið gagnrýnd vegna þess að fjármögnun frá ríki hefur ekki alltaf fylgt með og því er óskað eftir því hvort sveitarstjórn hafi mat á því hvaða kostnaður kunni að falla á sveitarfélagið vegna aukinna krafna í þessum málaflokki og hvort sveitarfélagið muni óska eftir frekari fjárframlögum frá ríkinu.
Varðandi markmið um að auka atvinnuþátttöku fatlaðs fólks og aðgengi að vinnumarkaði er það ávalt mikilvægt en jafnframt er bent á að þegar hafa verið í gangi verkefni á þessu sviði undanfarin ár. Því er óskað eftir upplýsingum um hvort fyrirhugaðar séu breytingar á núverandi verkefnum eða ný verkefni, hvaða samstarf við atvinnulíf sé fyrirhugað og hvernig sveitarstjórn hyggst tryggja framgang þessara markmiða í framkvæmd.
Þá er jafnframt óskað eftir því hvernig árangur á þessu sviði verði mældur. Á að setja aukið fjármagn í þennan málaflokk og hvar og hvernig á umsýslunni að vera háttað?
Að lokum er kveðið á um að efla samþættingu og stuðning við nýja íbúa sveitarfélagsins. Það er jákvætt markmið og samfélagslega mikilvægt að taka vel á móti nýjum íbúum, ekki síst í ljósi vaxandi áskorana og fordóma í samfélaginu.
Hins vegar vantar nánari útfærslu á því hvað felst í slíkum stuðningi og samþættingu í reynd, hvaða aðgerðir eru fyrirhugaðar og hvernig þær verða útfærðar í framkvæmd.
Þá er jafnframt mikilvægt að tryggja að slík verkefni séu fjármögnuð með skýrum hætti og því er óskað eftir upplýsingum um hvaða verkefni séu fyrirhuguð umfram lögbundið hlutverk sveitarfélagsins og hvaða kostnaður sé áætlaður vegna þeirra. Á að setja aukinn kostnað í forvarnir og/eða auka stöðugildi til þess að sinna þessum málaflokki?
4.
Menning, íþróttir og samfélag
Undir kafla um menningu, íþróttir og samfélag er ljóst að mörg þeirra markmiða sem þar eru sett fram varða ólögbundin verkefni sveitarfélagsins, ólíkt t.d. skóla-, félags- og velferðarþjónustu sem hvílir á skýrum lagalegum skyldum. Þetta á meðal annars við um eflingu menningarlífs, stuðning við menningarstofnanir, ýmis samfélagsverkefni, aukna viðburðastarfsemi og hluta stuðnings við íþróttastarf.
Um er að ræða verkefni sem geta vissulega aukið lífsgæði og gert sveitarfélagið eftirsóknarverðara, en eru jafnframt valkvæðari aðgerðir en lögbundin þjónusta. Í því ljósi er óskað eftir skýringum á því hvernig forgangsröðun verður háttað ef fjárhagur sveitarfélagsins þrengist, hvort tryggt verði að lögbundin þjónusta verði alltaf fullfjármögnuð áður en auknu fjármagni er varið í ólögbundin verkefni, og hvaða áhrif aukin framlög til menningar- og samfélagsverkefna kunni að hafa á aðra málaflokka sveitarfélagsins.
Varðandi markmiðið um að efla menningarlíf og menningartengda starfsemi er óskað eftir skýringu á því hvaða starfsemi eigi sérstaklega að efla og hvort gert sé ráð fyrir auknu fjármagni til menningarmála. Ef svo er, er óskað eftir upplýsingum um umfang þess fjár, hvernig forgangsröðun verður ákvörðuð og hvaða menningarmála helst er horft til.
Þá er kveðið á um að styðja við safnastarfsemi og menningarstofnanir. Ekki liggur fyrir hvort um sé að ræða áframhaldandi stuðning eða aukin framlög. Óskað er eftir skýringum á því hvaða stofnanir muni njóta forgangs og á hvaða forsendum sú forgangsröðun verður byggð.
Varðandi markmið um að styrkja íþróttafélög og bæta aðstöðu til íþróttaiðkunar er ljóst að slík verkefni geta kallað á verulegar fjárfestingar og framkvæmdir. Því er óskað eftir upplýsingum um hvaða verkefni séu fyrirhuguð á þessu sviði. Í því samhengi er jafnframt óskað eftir skýringu á því hvaða aðstöðu sveitarfélagið hyggst bæta sérstaklega og forgangsröðun.
Báðir listar meirihlutans héldu því fram í kosningabaráttunni að opna ætti allar sundlaugar sveitarfélagsins allt árið. Er það áfram stefna meirihlutans? Verður því sett aukið fjármagn í rekstur íþróttamannvirkja og fleiri stöðugildi?
Ekki hafa náðst samningar við UMSB meðal annars vegna ágreinings um útfærslu og fjármögnun. Mikilvægt er að gerður verði samningur þannig að íþróttafélögin fái það fjármagn sem gert hefur verið ráð fyrir í fjárhagsáætlun fyrir árið 2026. Í ljósi þess er óskað eftir því hvort stefna sveitarstjórnar sé að efla yfirbyggingu UMSB og verkefni þar eða að auka það fjármagn sem fer beint til íþróttafélaganna sjálfra?
Varðandi markmið um að auka aðgengi barna og ungmenna að tómstundastarfi er það jákvætt markmið en óskað er eftir nánari útfærslu á því hvort helstu hindranir séu fjárhagslegar, landfræðilegar eða skipulagslegar og hvaða úrræði séu fyrirhuguð til að bregðast við þeim. Hvernig sér meirihluti sveitarstjórnar fyrir sér að auka aðgengi barna og ungmenna að íþrótta- og tómstundastarfi?
Þá er kveðið á um að efla félagsstarf og samfélagslega þátttöku íbúa. Það er jákvætt markmið en erfitt að leggja mat á það þar sem ekki fylgja því skýr eða mælanleg markmið. Óskað er eftir því með hvaða hætti sveitarstjórn hyggst efla félagsstarf og samfélagslega þátttöku, hvernig slík þátttaka verði skilgreind og hvernig árangur verði metinn.
Að lokum er sett fram það markmið að stuðla að öflugu mannlífi sem eykur lífsgæði. Það er mjög almennt orðað og því er óskað eftir nánari skýringu á því hvaða aðgerðir eigi að leiða til þess markmiðs og með hvaða hætti íbúar geti metið hvort árangur hafi náðst. Á að setja aukið fjármagn eða stöðugildi til þess að efla félagsstarf og samfélagslega þátttöku íbúa og stuðla að öflugu mannlífi sem eykur lífsgæði?
5.
Atvinnumál
Undir kafla um atvinnumál er jákvætt að sjá áherslu á öflugt atvinnulíf, nýsköpun og áframhaldandi styrk landbúnaðar, þar sem atvinnuuppbygging er ein af lykilforsendum vaxtar og velferðar í sveitarfélaginu. Hins vegar vekur athygli að mörg markmið kaflans eru almennt orðuð og erfitt er að sjá hvaða aðgerðir liggja þeim til grundvallar í framkvæmd.
Varðandi markmiðið um að stuðla að fjölbreyttu og öflugu atvinnulífi er það markmið sem flestir geta tekið undir, en óskað er eftir skýringu á því hvernig sveitarfélagið hyggst hafa raunveruleg áhrif á þróun atvinnulífsins og hvort tilteknar atvinnugreinar verði settar í forgang.
Þá er kveðið á um að tryggja framboð atvinnulóða. Þar sem sveitarfélagið hefur þar verulegt hlutverk í gegnum skipulagsvald sitt er eðlilegt að óska eftir upplýsingum um hvort núverandi framboð atvinnulóða sé talið ófullnægjandi, en fjöldi atvinnulóða er nú tilbúinn til afhendingar. Hvaða svæði eru fyrirhuguð til framtíðaruppbyggingar?
Varðandi stuðning við nýsköpun og frumkvöðlastarf er ljóst að sveitarfélög hafa almennt takmörkuð bein áhrif á slíkt samanborið við ríki og atvinnuþróunarfélög. Því er óskað eftir skýringu á því hvaða hlutverki sveitarfélagið sér sér fært að gegna á þessu sviði og hvaða úrræði eða verkefni eru fyrirhuguð í framkvæmd hjá meirihluta?
Einnig er fjallað um stuðning við fjarvinnu og nútímalegan vinnumarkað. Það er áhugaverð áhersla en þarfnast nánari útfærslu. Óskað er eftir skýringum á því hvort þetta feli í sér uppbyggingu innviða, vinnuaðstöðu, húsnæðis eða stafrænnar þjónustu, og hvort sveitarfélagið hyggist fjármagna eða reka slíka aðstöðu sjálft, þar með talið hvort um sé að ræða byggingu, leigu eða rekstur á vinnurýmum fyrir íbúa og fyrirtæki. Jafnframt er óskað eftir upplýsingum um áætlaðan kostnað og rekstrarfyrirkomulag slíks verkefnis.
Varðandi markmiðið um að tryggja áframhaldandi sterka stöðu landbúnaðar sem lykilatvinnugreinar er bent á að landbúnaður er ein af burðarstoðum sveitarfélagsins, en jafnframt að stór hluti rekstrarskilyrða greinarinnar er á forræði ríkisins fremur en sveitarfélagsins. Því er óskað eftir því hvaða aðgerðir sveitarfélagið hyggst sjálft ráðast í til að styðja við greinina og hvernig það hyggst í reynd tryggja þessa stefnu?
Þá er kveðið á um að efla samstarf sveitarfélagsins og atvinnulífsins. Það er jákvætt markmið en það vantar skýrari útfærslu. Óskað er eftir skýringum á því hvernig slíkt samstarf verði aukið, hvernig tryggt verði að rödd atvinnulífsins komi að stefnumótun sveitarfélagsins og hvort fyrirhugað sé að setja á laggirnar sérstaka atvinnu- eða markaðsnefnd til að sinna þessu hlutverki. Einnig hvort setja eigi sérstakt fjármagn eða stöðugildi í þetta verkefni.
Varðandi fyrirhugaða atvinnu-, byggða- og húsnæðisstefnu er um að ræða eitt af lykilatriðum kaflans. Sveitarfélagið hefur lögbundið hlutverk í skipulagsmálum, landnýtingu og húsnæðisuppbyggingu og þar liggja helstu stjórntæki þess til að hafa áhrif á framtíðarþróun samfélagsins.
Í því ljósi er jákvætt að lögð sé áhersla á langtímasýn í byggðamálum, fyrirsjáanleika fyrir íbúa og atvinnulíf, tengingu atvinnuuppbyggingar og húsnæðismála og heildstæða stefnumótun sem taki mið af þörfum samfélagsins. Hvernig verður aðkoma íbúa, atvinnulífs og sveitarstjórnar tryggð í mótunarferlinu? Verða sett fram mælanleg markmið um atvinnuþróun, fólksfjölgun og húsnæðisuppbyggingu og hvaða forsendur liggja til grundvallar mati á framtíðarþörf sveitarfélagsins?
Varðandi umhverfis- og skipulagsmál er fjallað um að taka upplýstar ákvarðanir með sjálfbærni að leiðarljósi. Það er jákvætt markmið en jafnframt mjög almennt orðað og því er óskað eftir skýringu á því hvernig sjálfbærni verði skilgreind og mæld, hvort horft verði til fjárhagslegrar, umhverfislegrar og samfélagslegrar sjálfbærni og hvernig tryggt verði að hugtakið verði raunverulegt stjórntæki í ákvarðanatöku en ekki einungis almenn stefnumótandi yfirlýsing.
Einnig er kveðið á um vernd náttúru og líffræðilegrar fjölbreytni, sem er mikilvægt markmið en getur jafnframt kallað á takmarkanir á landnýtingu og uppbyggingu. Því er óskað eftir skýringum á því hvernig sveitarfélagið hyggst tryggja jafnvægi milli náttúruverndar annars vegar og atvinnuuppbyggingar, búsetu og nýtingar lands hins vegar, hvort fyrirhuguð sé sérstök stefna eða kortlagning verndarsvæða og hvernig slíkar ákvarðanir verði teknar í framkvæmd.
Varðandi úrgangsstjórnun og aðgengi að þjónustu í dreifbýli er óskað eftir upplýsingum um hvaða breytingar séu fyrirhugaðar, hvaða verkefni og forgangsröðun liggi þar að baki og hver áætlaður kostnaður sé. Þá er jafnframt óskað eftir skýringum á því hvernig bæta eigi þjónustu í dreifbýli og hvort það kunni að hafa áhrif á sorphirðugjöld íbúa, þar sem slík gjöld eiga almennt að vera kostnaðarmiðuð.
Þá er kveðið á um að tryggja fjölbreytt framboð lóða. Telur nýr meirihluti að þar hafi fráfarandi sveitarstjórn ekki staðið sig? Þar sem það er eitt af kjarnahlutverkum sveitarfélagsins er óskað eftir því hvort sett verði fram mælanleg markmið um fjölda lóða, uppbyggingarsvæði og tímasetningar og með hvaða hætti tryggt verði að markmið um fjölbreytt framboð lóða verði raunhæf í framkvæmd.
Að lokum er fjallað um að setja fram heildstæða áætlun um göngu- og hjólastíga, sem er jákvætt markmið sem getur aukið öryggi og lífsgæði en mjög almennt orðuð. Hins vegar er óskað eftir því að kostnaður, forgangsröðun og framkvæmdaáætlun liggi fyrir, þar á meðal hvaða svæði séu í mestri þörf og hvaða verkefni muni fara fyrst af stað. Einnig er rétt að benda á það að vinna er í gangi á skipulagssviði um akkúrat slíka áætlun og rétt sé að nýta þá vinnu áfram.
6.
Bifröst
Undir kafla um Bifröst er jákvætt að sjá sérstaka áherslu á svæðið og framtíðarþróun þess, enda um að ræða mikilvægt byggðasvæði innan sveitarfélagsins með fyrrum háskólastarfsemi og sérstöðu í búsetumynstri. Hins vegar vekja nokkur atriði spurningar um hlutverk sveitarfélagsins, valdheimildir þess, eignarhald og raunhæfa framkvæmd stefnumótunar.
Varðandi áherslu á að efla samstarf um framtíðarsýn fyrir svæðið er rétt að undirstrika að samstarf og samráð eru almennt jákvæð, en jafnframt er óskað eftir skýrari afmörkun á því hvert raunverulegt vald sveitarfélagsins er á Bifröst.
Ef sveitarfélagið á hvorki land né húsnæði á svæðinu er óskað eftir skýringum á því hvaða stjórntæki það hefur í raun til að hafa áhrif á atvinnuuppbyggingu og hvert hlutverk þess er umfram skipulagsvald og umsagnarhlutverk í stjórnsýsluferlum.
Varðandi tillögu um að komið verði á starfshópi um málefni Bifrastar er bent á að starfshópar geta verið gagnlegir til undirbúnings vinnu, en þeir hafa ekki sjálfstætt ákvörðunarvald og leiða ekki sjálfkrafa til framkvæmda. Bent er á að nú þegar eru til staðar Hollvinasamtök Bifrastar og mikilvægt sé að þau séu fengin með þegar kemur að umræðum varðandi Bifröst.
Óskað er eftir skýringu á því hvaða vandamál eða áskoranir þessi starfshópur á að leysa sem núverandi stjórnsýsla getur ekki tekið á, hvaða niðurstöður eru væntanlegar og hvaða áhrif þær eiga að hafa á framkvæmd og fjárhagslega ábyrgð sveitarfélagsins.
Þá er í kaflanum vísað til mannúðar, virðingar og inngildingar sem grundvallarviðmiða í þróun svæðisins. Þótt um sé að ræða jákvæð og mikilvæg gildi er jafnframt bent á að þau séu almennt viðmið sem ættu að gilda í allri stjórnsýslu sveitarfélagsins en ekki eingöngu í tengslum við eitt svæði eða tiltekinn hóp.
Því er óskað eftir skýringu á því hvers vegna þessi gildi eru sérstaklega dregin fram í tengslum við Bifröst og hvort þau eigi ekki jafnframt að vera almenn leiðarljós sveitarfélagsins í heild. Auk þess er talað um að koma eigi á samgöngum sem fyrst.
Sér meirihlutinn fyrir sér að koma þá einnig á samgöngum úr öðrum þéttbýliskjörnum, s.s. Reykholti, Varmalandi, Kleppjárnsreykjum og Hvanneyri eða innanbæjar í Borgarnesi, eða á einungis að bjóða íbúum á Bifröst upp á almenningssamgöngur? Jafnframt er rétt að benda á það að tilraun hefur verið gerð með slíkar samgöngur frá Bifröst og í Borgarnes en það varð að hætta því vegna lélegrar nýtingar.
Að lokum er bent á að í málefnasamningi er sérstakur kafli um Hvanneyri og Reykholt, en ekki er sambærilegur kafli um Borgarnes, sem er stærsti þéttbýliskjarni sveitarfélagsins.
Í ljósi þess er óskað eftir því hvort meirihlutinn hafi mótaða og sérstaka sýn á uppbyggingu Borgarness, þar með einnig talið varðandi mannúð, virðingu, inngildingu og almenna samfélagslega og efnahagslega uppbyggingu, og hvernig sú sýn birtist í stefnumótun sveitarfélagsins.
Varðandi Brákarey þá fögnum við því að haldið verði áfram að vinna að samningi við Festi um uppbyggingu á svæðinu, og að sjálfsögðu verður sá samningur gerður opinber ef hann verður gerður, enda hefði aldrei neitt annað komið til greina af hendi fráfarandi meirihluta, en eðli máls samkvæmt eru upplýsingar ekki opinberar á meðan viðræðum stendur.
Málefnasamningurinn inniheldur mörg jákvæð markmið sem auðvelt er að taka undir. Hins vegar tel ég mikilvægt að skýrari greinarmunur sé gerður á lögbundnum verkefnum sveitarfélagsins og þeim verkefnum sem sveitarfélagið velur að sinna umfram lagaskyldur.
Íbúar eiga rétt á að vita hvernig meirihlutinn hyggst forgangsraða fjármunum sveitarfélagsins, sérstaklega þegar um er að ræða ólögbundin verkefni sem keppa um fjármagn við grunnþjónustu á borð við skóla-, félags- og velferðarþjónustu. Án slíkrar forgangsröðunar er erfitt að meta raunverulegt umfang og framkvæmanleika þeirra fyrirheita sem fram koma í samningnum."
Sigurður Guðmundsson D - lista lagði fram eftirfarandi bókun fyrir hönd minnihlutans: "Samstarf D- og A lista hefur verið rammað inn í málefnasamning þar sem lögð er áhersla á að byggja upp sterkt og sjálfbært samfélag þar sem velferð íbúa og ábyrg fjármál fara saman. Markmið meirihlutans er að tryggja skýra stjórnun, stöðugleika og aukið traust milli íbúa og kjörinna fulltrúa. Meirihlutinn mun vinna saman að því að skapa samfélag þar sem allir íbúar sveitarfélagsins njóta jafnræðis, hvort sem er í dreifbýli eða þéttbýli. Samstarf, gagnsæi og ábyrgð eru lykillinn að árangri á komandi kjörtímabili. Við erum bjartsýn á framtíð Borgarbyggðar og sjáum eins og allir íbúar mikil tækifæri til vaxtar í okkar fallega sveitarfélagi."
Til máls tók: DS, HÞH, SLE og SG
4. Kosningar í ráð og nefndir 2026 - 2030
Framlögð tillaga um að byggðarráð skipi, eftirtaldir aðal - og varamenn auk áheyrnarfulltrúa:
Aðalmenn:
Sigurður Guðmundsson - formaður
Ragnhildur Eva Jónsdóttir - varaformaður
Davíð Sigurðsson
Varamenn:
Kristján Ágúst Magnússon
Birgir Heiðar Andrésson
Sonja Lind Eyglóardóttir
Áheyrnarfulltrúar:
Jovana Pavlovic
Haukur Þór Hauksson
Varaáheyrnarfulltrúar:
Hermann B. Valsson
Þórður Brynjarsson
5. Kosningar í ráð og nefndir 2026 - 2030
Framlögð tillaga um að eftirtaldir skipi skipulags- og byggingarnefnd sem aðal- og varamenn:
Aðalmenn:
Hermann B. Valsson, formaður
Svana Hrönn Jóhannsdóttir, varaformaður
Bjarni Bequette
Davíð Sigurðsson
Hafsteinn Ingi Gunnarsson
Varamenn:
Lárus Elíasson
Margrét H. Guðmundsdóttir
Friðrik Aspelund
Valdimar Reynisson
Þórður Brynjarsson
6. Kosningar í ráð og nefndir 2026 - 2030
Framlögð tillaga um að eftirtaldir skipi umhverfis og landbúnaðarnefnd sem aðal- og varamenn:
Aðalmenn:
Kristján Ágúst Magnússon, formaður
Þorsteinn Eyþórsson, varaformaður
Sigrún Ólafsdóttir
Jón Eiríkur Einarsson
Þórður Brynjarsson
Varamenn:
Gísli Guðjónsson
Brynja Þorsteinsdóttir
Friðrik Aspelund
Ásdís Helga Bjarnadóttir
Helgi Már Ólafsson
7. Kosningar í ráð og nefndir 2026 - 2030
Framlögð tillaga um að eftirtaldir skipi velferðarnefnd sem aðal- og varamenn:
Aðalmenn:
Ragnhildur Eva Jónsdóttir, formaður
Hákon Konráðsson, varaformaður
Svana Hrönn Jóhannsdóttir
Sonja Lind Eyglóardóttir
Tinna Rut Þórarinsdóttir
Varamenn:
Kristján Ágúst Magnússon
Ólafur Tryggvason
Melkorka Gunnarsdóttir
Kristín Erla Guðmundsdóttir
Helena Rós Helgadóttir
8. Kosningar í ráð og nefndir 2026 - 2030
Framlögð tillaga um að eftirtaldir skipi fræðslunefnd sem aðal- og varamenn:
Aðalmenn:
Ragnhildur Eva jónsdóttir, formaður
Guðrún Vala Elísdótti, varaformaður
Sigríður Guðbjartsdóttir
Guðdís Jónsdóttir
Tinna Rut Þórarinsdóttir
Varamenn:
Birgir Heiðar Andrésson
Ólafur Tryggvason
Sólveig Hallsteinsdóttir
Inga Berta Bergsdóttir
Helena Rós Helgadóttir
9. Kosningar í ráð og nefndir 2026 - 2030
Aðalmenn
Þórður Gíslason
Sigrún Ólafsdóttir
Ásbjörn Pálsson
Varamenn
Gísli Þórðarson
Sigríður Jóna Sigurðardóttir
Jóhannes Jónasson
10. Kosningar í ráð og nefndir 2026 - 2030
Aðalmenn:
Gísli Guðjónsson
Unnur Sigurðardóttir
Sigurjón Helgason
Varamenn:
Jakob Arnar Eyjólfsson
Gísli Friðjónsson
Brynjólfur Guðbrandsson
11. Kosningar í ráð og nefndir 2026 - 2030
Lagt er til að eftirfarandi fulltrúar skipi fjallskilnefnd Grímsstaðaréttar:
Aðalmenn:
Guðmundur Páll Sturluson
Hanna Sigríður Kjartansdóttir
Helgi Már Ólafsson
Varamenn:
Stefán Ingi Ólafsson
Guðrún Sigurðardóttir
Sigurbjörn Garðarsson
12. Kosningar í ráð og nefndir 2026 - 2030
Lagt er til að eftirfarandi skipi fjallskilnefnda Brekku- og Svignaskarðsréttar:
Aðalmenn:
Bergþór Jóhannesson
Halldóra Jónasdóttir
Sigvaldi Jónsson
Varamenn:
Heiða Dís Fjeldsteð
Þorsteinn Viggósson
13. Kosningar í ráð og nefndir 2026 - 2030
Aðalmenn
Ingi Björgvin Reynisson
Telma Dögg Harðardóttir
Einar Guðmann Örnólfsson
Sigurður Rúnar Gunnarsson
Varmanenn
Davíð Sigurðsson
Guðjón Þorsteinsson
14. Kosningar í ráð og nefndir 2026 - 2030
Aðalmenn
Íris Þórlaug Ármannsdóttir
Ingimundur Jónsson
Kolbeinn Magnússon
Varamenn
Jón Eyjólfsson
Magnús Þór Eggertsson
Gíslína Jensdóttir
15. Kosningar í ráð og nefndir 2026 - 2030
Aðalmenn
Haraldur Sigurðsson
Ragnhildur Eva Jónsdóttir
Jóhannes Kristjánsson
Varamaður
Unnsteinn Snorri Snorrason
Anna Heiða Baldursdóttir
Hallgrímur Sveinsson
16. Útboð á skóla- og tómstundaakstri fyrir skólaárið 2026-2027
Samþykkt með 6 atkvæðum: SG, KÁM, JP, HBV, REJ og ÞB
Sat hjá: DS og HÞH
Til máls tók: DS
Sonja Lind Eyglóardóttir vék af fundi undir þessum fundarlið
17. Reglur um tölvubúnað sveitarstjórnarmanna 2026-2030
Samþykkt samhljóða
18. Ráðningarsamningur sveitarstjóra 2026
Samþykkt samhljóða
19. Skilaskýrsla undirbúningsstjórnar um sameiningu Borgarbyggðar og Skorradalshrepps
20. Reglur og gjaldskrár í sameinuðu sveitarfélagi Borgarbyggðar og Skorradalshrepps
Launakjör sveitarstjórnar,
byggðarráðs,
nefnda og vinnuhópa hjá Borgarbyggð,
Siðareglur kjörinna fulltrúa,
Reglur um birtingu gagna með fundargerðum,
Úthlutunarreglur Menningarsjóða Borgarbyggðar,
Reglur um samstarfssamninga vegna hátíða í sveitarfélaginu,
Reglur um styrktarlínur og auglýsingar,
Reglur um tilnefningu listamanneskju Borgarbyggðar,
Reglur um uppsetningu ljósastaura í dreifbýli 2024,
Reglur um framkvæmdastyrki til íþrótta og tómstundafélaga,
Reglur um fjárhagsaðstoð,
Reglur um veitingu fjárstyrks vegna lögmannskostnaðar,
Reglur um skólaakstur í grunnskóla,
Reglur um úthlutun félagslegra íbúða,
Reglur um sérstakan húsnæðisstuðning,
Reglur um stuðnings- og stoðþjónustu,
Reglur um styrki til starfsmanna í skólum,
Reglur vegna efnilegra ungmenna sem leggja stund á íþróttir, tómstundir og listir í Vinnuskóla Borgarbyggðar,
Starfsreglur um stuðning í skólum Borgarbyggðar,
Reglur um akstursþjónustu eldri borgara,
Verklagsreglur fyrir leikskóla Borgarbyggðar,
Viðmiðunarreglur Borgarbyggðar vegna skóladvalar barna utan lögheimilissveitarfélags,
Samþykkt um meðhöndlun úrgangs í Borgarbyggð nr. 898/2022,
Samþykkt um fráveitur og rotþrær í Borgarbyggð,
Samþykkt um hunda- og kattahald í Borgarbyggð,
Samþykkt um hesthús og umgengni í hesthúsahverfi í Borgarbyggð,
Samþykkt um búfjárhald í Borgarbyggð,
Fjallskilasamþykkt fyrir sveitarfélögin Akraneskaupstað,
Borgarbyggð, Hvalfjarðarsveit og Skorradalshrepp,
Samþykkt fyrir stjórn fjallskilaumdæmis Akraneskaupstaðar, Borgarbyggðar, Hvalfjarðarsveitar og Skorradalshrepps,
Reglur um úthlutun lóða í Borgarbyggð,
Verklagsreglur við veitingu umsagna um rekstrarleyfi hjá Borgarbyggð,
Reglur um uppsetningu ljósastaura í dreifbýli,
Reglur um frístundastyrk fyrir börn og ungmenni í Borgarbyggð,
Reglur um innritun í leik- og grunnskóla,
Gjaldskrá Slökkviliðs Borgarbyggðar,
Gjaldskrá fyrir Vatnsveitu Álftaneshrepps í Borgarbyggð,
Gjaldskrá fyrir gatnagerðargjald í Borgarbyggð,
Gjaldskrá fyrir Vatnsveitu Hraunhrepps í Borgarbyggð,
Gjaldskrá fyrir hitaveitu á Varmalandi, Borgarbyggð,
Gjaldskrá fyrir byggingarleyfis- og þjónustugjöld byggingarfulltrúa Borgarbyggðar, Gjaldskrá vegna kostnaðar við skipulagsvinnu, stofnun og breytingu lóða og útgáfu framkvæmdaleyfa í Borgarbyggð,
Gjaldskrá fyrir stofngjald fráveitu í Borgarbyggð,
Gjaldskrá fyrir afgreiðslu umsókna, leyfisveitingar og þjónustu skipulags- og byggingarfulltrúaembættis Skorradalshrepps,
Gjaldskrá skipulags- og byggingarnefndar Skorradalshrepps,
Gjaldskrá félagsheimila í Borgarbyggð 2025,
Gjaldskrá Hjálmakletts 2026,
Héraðsbókasafnið ? verðskrá 2026,
Safnhús ? verðskrá 2025,
Gjaldskrá Fjölskyldusviðs Borgarbyggðar 2026,
Gjaldskrá íþróttamiðstöðva 2026,
Gjaldskrá fyrir frístund 2026,
Ljósleiðari Borgarbyggðar 2026,
Tónlistarskóli 2026,
Systkinaafsláttur 2025,
Gjaldskrá leikskóla 2026,
Slökkvitækjaþjónusta 2026,
Gjaldskrá fyrir ljósritun 2025.
Samþykkt samhljóða
21. Umboð til handa fyrrum oddvita sveitarstjórnar Skorrdalshrepps
Lagt er til að Jón Eiríkur Einarsson fyrrum oddviti Skorradalshrepps kt. 021068-5789 fái umboð til þess að samþykkja og láta greiða reikninga til að klára fjárhagsleg uppgjör sveitarfélaganna.
Samþykkt samhljóða