Skipulags- og byggingarnefnd Borgarbyggðar

1. Umsókn um deiliskipulag

Lögð er fram lýsing að deiliskipulagi fyrir Sveinukot (L237748). Deiliskipulagssvæðið fyrir lóðina Sveinukot sem stofnuð er úr landareigninni Samtún (L134457) og er 4,8ha að stærð. Í endurskoðun aðalskipulags Borgarbyggðar 2025-2037 er landnotkun lóðarinnar breytt úr landbúnaðarlandi í verslun og þjónustu. Fyrirhugað er að byggja upp lágstemmda gistiþjónustu með 19 smáhýsum auk sameiginlegrar baðaðstöðu, alls um 610m². Aðkoma að svæðinu verður um núverandi vegslóða inn á túnið frá Reykdælavegi (nr.517). Hönnuður er á lista Skipulagsstofnunar um samþykkta ráðgjafa.

Skipulags- og byggingarnefnd, sem fer með fullnaðarafgreiðsluvald sveitarstjórnar skv. samþykkt um stjórn Borgarbyggðar, samþykkir lýsingu til auglýsingar fyrir Sveinukot skv. 3. mgr. 40. gr. skipulagslaga 123/2010.

Samþykkt samhljóða.

2. Mýrar 134435 - Umsókn um byggingaráform og byggingarleyfi

Lögð er inn umsókn um byggingarleyfi þar sem íbúðarhúsi að Mýrum (L134435) er breytt í gistiheimili. Húsið hefur verið endurgert og því breytt í gistihús með 8 herbergjum. Herbergin hafa hvert um sig eigin inngang og snyrtingu. Auk þess eru tvær snyrtingar og tvö sturturými til afnota fyrir gesti tjaldsvæðis og geymsla sem nýtist eiganda. Ekkert deiliskipulag er á svæðinu.

Skipulags- og byggingarnefnd sem fer með fullnaðarafgreiðsluvald sveitarstjórnar skv. samþykkt um stjórn Borgarbyggðar bendir á að samkvæmt gildandi aðalskipulagi og endurskoðuðu aðalskipulagi sem nú er í ferli er skilyrt að ef reka á gistingu á landbúnaðarlandi þarf að vera föst búseta á jörðinni. Nefndin vísar í fyrri bókun nefndarinnar frá fundi nr. 80 þann 7. nóvember 2025 er varðar skipulag og landnotkun svæðisins. Nefndin felur skipulagsfulltrúa og byggingarfulltrúa að svara erindinu.

Samþykkt samhljóða.

3. Háhóll-Hafdísalundur 200282 - Umsókn um byggingaráform og byggingarleyfi

Lögð er inn umsókn um byggingarleyfi fyrir 121 m² einbýlishúsi ásamt 60,1 m² bílageymslu á lóðinni Háhóll-Hafdísarlundur (L200282). Um er að ræða íbúðarhús og bílgeymslu byggt úr timbri. Lóðin er 18 ha og landnotkun er skilgreind sem landbúnaðarland í flokki III í endurskoðun aðalskipulags Borgarbyggðar 2025-2037. Ekkert deiliskipulag er á svæðinu.

Skipulags- og byggingarnefnd sem fer með fullnaðarafgreiðsluvald sveitarstjórnar skv. samþykkt um stjórn Borgarbyggðar felur skipulagsfulltrúa að grenndarkynna byggingaráformin og afla umsagna lögbundinna umsagnaraðila.

Samþykkt samhljóða.

4. Hamar 135401 - umsókn um framkvæmdarleyfi - 135401

Á 66. afgreiðslufundi skipulagsfulltrúa þann 25.11.2025 var samþykkt að grenndarkynna fyrirhugaða framkvæmd á uppbyggingu og breytingu á Hamarsvelli (L135401). Grenndarkynnt var fyrir nágrönnum sem hagsmuna eiga að gæta og öðrum hagsmunaaðilum í gegnum skipulagsgátt. Kynningartíminn var frá 26.11.25-29.12.25. Athugasemdir bárust frá 2 aðilum á kynningartíma.

Skipulags- og byggingarnefnd felur skipulagsfulltrúa að gefa út framkæmdaleyfi þar sem grenndarkynning hefur farið fram skv. 44. gr. skipulagslaga 123/2010. Skipulags- og byggingarnefnd felur skipulagsfulltrúa að svara framkomnum athugasemdum.

Samþykkt samhljóða.

5. Syðstu-Fossar - umsókn um framkvæmdarleyfi - 133909

Á fundi skipulags- og byggingarnefndar nr. 81 þann 5. desember 2025 var eftirfarandi bókað: "Skipulags- og byggingarnefnd telur að ekki sé hægt að draga aðra ályktun en að framkomin gögn hafi verið misvísandi eins og fram hefur komið í athugasemdum við grenndarkynningu og fer nefndin því fram á að framkvæmdaraðili sendi inn uppfærð gögn og málið grenndarkynnt að nýju."

Skipulagsfulltrúi leggur hér fram uppfærð gögn til kynningar og samþykktar nefndarinnar til grenndarkynningar.

Skipulags- og byggingarnefnd sem fer með fullnaðarafgreiðsluvald sveitarstjórnar skv. samþykkt um stjórn Borgarbyggðar samþykkir meðfylgjandi gögn til grenndarkynningar.

Samþykkt samhljóða.

6. Afgreiðslufundur skipulagsfulltrúa - 67

7. Afgreiðslufundur skipulagsfulltrúa - 68

8. Afgreiðslufundur byggingarfulltrúa - 254