Byggðarráð Borgarbyggðar

729. fundur

4. desember 2025 kl. 08:15 - 14:05

í fundarsal að Digranesgötu 2

Nefndarmenn

Davíð Sigurðsson - formaður
Guðveig Eyglóardóttir - varaformaður
Thelma Dögg Harðardóttir boðaði forföll og Brynja Þorsteinsdóttir - áheyrnarfulltrúi sat fundinn í hans stað
Sigurður Guðmundsson boðaði forföll og Ragnhildur Eva Jónsdóttir - varamaður sat fundinn í hans stað
Bjarney Lárudóttir Bjarnadóttir - áheyrnarfulltrúi

Starfsmenn

Stefán Broddi Guðjónsson - sveitarstjóri
Lilja Björg Ágústsdóttir - Sviðsstjóri
Fundargerð ritaði: Stefán Broddi Guðjónsson - sveitarstjóri

Dagskrá

1. Fjárhagsáætlun 2026
2505064

Farið yfir stöðu vinnu við fjárhagsáætlun 2026 sem lögð verður fram til seinni umræðu í sveitarstjórn 11. desember 2025. Til fundarins koma Eiríkur Ólafsson fjármálastjóri og Hlöðver Ingi Gunnarsson sviðsstjóri fjölskyldusviðs.

Farið var yfir þær breytingar sem gerðar hafa verið á fjárhagsáætlun og fjárfestingaáætlun í vinnu byggðarráðs og fastanefnda á milli umræðna. Byggðarráð samþykkir að vísa fjárhagsáætlun vegna ársins 2026 og fjárfestingarramma 2026-2029 til seinni umræðu í sveitarstjórn.



Samþykkt samhljóða.




2. Viðauki við fjárhagsáætlun 2025
2502016

Lagður fram viðauki VI við fjárhagsáætlun 2025.

Framlagður viðauki VI við fjárhagsáætlun og framkvæmdaáætlun 2026. Í honum felst að áætlun um launakostnað grunnskóla er hækkuð um 30 m.kr. sem skiptist þannig að áætlun fyrir Grunnskólann í Borgarnesi hækkar um 17,4 m.kr. og um 12,6 m.kr. fyrir Grunnskóla Borgarfjarðar. Á móti eru óreglulegir liðir færðir niður um 30 m.kr.

Þá er áætlaður kostnaður vegna sameiningarmála að fjárhæð 35 m.kr. Á móti þeim kostnaði eru áætlað framlag frá Jöfnunarsjóði sveitarfélaga um 35 m.kr. Að auki er áætlaður kostnaður vegna kærumála í kjölfar kosninga að fjárhæð 5,3 m.kr. Sveitarfélagið væntir þess að sú fjárhæð fáist endurgreidd frá Jöfnunarsjóði.

Í framkvæmda- og fjárfestingaráætlun er áætluð hækkun að fjárhæð 23,4 m.kr. vegna búnaðarkaupa annars vegar í leikskólann Klettaborg að fjárhæð 5,4 m.kr. og hins vegar GBF á Kleppjárnsreykjum að fjárhæð 18,0 m.kr.

Samanlögð áhrif viðaukans leiða til lækkunar á handbæru fé í sjóðstreymisáætlun að fjárhæð 28,7 m.kr.

Því miður sér ekki fyrir endann á ráðgjafarkostnaði vegna kærumála er varðar fyrirhugaða sameiningu við Skorradalshrepp en málið er enn í farvegi hjá Innviðaráðuneytinu og bíður Borgarbyggð niðurstöðu þess. Þessi kærumeðferð og töf á afgreiðslu ráðuneytisins hefur leitt til þess að vinna við að ljúka við sameiningu sveitarfélaganna hefur ekki náð að hefjast. Byggðarráð harmar að málið sé enn í þessum farvegi, það veldur kostnaði og gerir það að verkum að nýskipuð undirbúningsstjórn um sameiningu sveitarfélaganna getur ekki hafið störf.



Samþykkt samhljóða og vísað til staðfestingar í sveitarstjórn.


3. Ósk um endurskoðun skólaaksturs í Lundarreykjadal og Bæjarsveit
2509057

Málið var tekið fyrir í fræðslunefnd og vísað í Byggðarráð til afgreiðslu.

Lagt fram minnisblað.

Byggðarráð leggur til við sveitarstjórn að samþykkja framlagða tillögu að breytingu á skólaakstursleiðinni um Lundarreykjadal og Bæjarsveit í tvær leiðir. Breytingin mun stuðla að því að akstursleið barna sem um lengstan veg þurfa að fara mun styttast verulega.



Samþykkt samhljóða.



Hlöðver Ingi Gunnarsson fór af fundi.


4. Gjaldskrár 2026
2510200

Lagðar fram tillögur að gjaldskrám skipulags- og umhverfissviðs 2026. Til fundarins koma Logi Sigurðsson umhverfisfulltrúi, Drífa Gústafsdóttir skipulagsfulltrúi og Sæmundur Óskarsson sviðsstjóri skipulags- og umhverfissviðs.

Framlagðar til umræðu í byggðarráði gjaldskrár skipulags- og umhverfissviðs. Byggðarráð samþykkir að vísa tillögum að gjaldskrám til samþykktar í sveitarstjórn að teknu tilliti til breytinga á tillögu að gjaldskrá skipulagsfulltrúa og byggingarfulltrúa sem ákveðnar voru á fundinum.



Samþykkt samhljóða.


5. Brákarey-Skipulagsmál
2412005

Haraldur Sverrisson og Valgerður Valgeirsdóttir frá PWC koma og kynna verkefnatillögu vegna aðkomu að uppbyggingu í Brákarey.

Byggðarráð felur sveitarstjóra að ganga til samningaviðræðna við PWC í samræmi við verkefnatillögu og leggja fram samning til staðfestingar í sveitarstjórn enda rúmast verkefnið innan fjárheimilda. Fjárhæðir eru undir viðmiðum sbr. 12. gr. innkaupastefnu Borgarbyggðar.



Samþykkt samhljóða.


6. Leigusamningur um land fyrir golfvöll að Hamri
2511138

Í samræmi við afgreiðsla byggðarráðsfundar nr. 729 mæta forsvarsmenn Golfklúbbs Borgarness á fund byggðarráðs.

Til fundarins komu undir þessum dagskrárlið Bjarki Pétursson framkvæmdastjóri GB og Þorkell Einarsson formaður og ræddu drög að endurnýjuðum samningi. Byggðarráð tekur undir mikilvægi þess að endurnýja samning um leigu á landi við Hamar undir starfsemi Golfklúbbs Borgarness. Byggðarráð felur sveitarstjóra að láta hnitsetja landið sem heyrir undir núverandi samning og taka í framhaldinu upp samtalið á nýjan leik.



Samþykkt samhljóða.


7. Grunnskóli Borgarfjarðar- Kleppjárnsreykjadeild - framkvæmdir á skólahúsnæði
2104092

Farið yfir stöðu vinnu við endurbyggingu GBF-Kleppjárnsreykjadeildar. Til fundarins koma Ottó Ólafsson og Hlynur Ólafsson verkefnastjórar á skipulags- og umhverfissviði. Framlagt minnisblað þeirra.

Nú líður að lokum framkvæmda við endurbyggingu hluta húsnæðis GBF á Kleppjárnsreykjum og lokafrágangur stendur yfir. Farið yfir stöðuna.

Ekkert virðist því til fyrirstöðu að skólahald geti hafist í nýbyggingunni strax á nýju ári.


8. Vatnsrennibraut við sundlaug í Borgarnesi
2511072

Yfirferð á úttektarskýrslu rennibrautar frá Eflu og lagt fram minnisblað verkefnastjóra á skipulags- og umhverfissviði.

Þörf er á endurnýjun rennibrauta við sundlaugina í Borgarnesi. Lögð fram tillaga að tveimur valkostum. Byggðarráð leggur til við sveitarstjórn að láta fara fram útboð eða verðfyrirspurn á afhendingu og uppsetningu endurnýjaðrar rennibrautar í sambærilegri mynd og hún er í dag.



Samþykkt samhljóða.


9. Félagslegt leiguhúsnæði
1810002

Í samræmi við bókun fundar byggðarráðs nr. 713 og velferðarnefndar nr. 164 er lagt fram minnisblað um næstu skref hvað varðar eignarhald og rekstur félagslegs leiguhúsnæðis á vegum Borgarbyggðar. Til fundarins kemur undir þessum lið Erla Björg Kristjánsdóttir félagsmálastjóri.

Byggðarráð samþykkir þá tillögu sem lögð er fram í minnisblaði að stefna skuli að sölu á hluta þess félagslega leiguhúsnæðis sem er í eigu sveitarfélagsins. Samhliða sölunni tryggi sveitarfélagið leiguhúsnæði fyrir skjólstæðinga í samstarfi við húsnæðissjálfseignarstofnanir (óhagnaðardrifin leigufélög). Byggðarráð felur sveitarstjóra að halda áfram samtali við óhagnaðardrifin leigufélög með það að markmiði að tryggja leigutökum í félagslegu húsnæði hagstæðari búsetu í nýju og væntanlegu húsnæði í Borgarbyggð. Sveitarstjóra falið að vinna stefnu um félagslegt leiguhúsnæði og leggja fyrir sveitarstjórn í janúar.

Markmiðið er að tryggja leigutökum hjá félagsþjónustu Borgarbyggðar húsnæði sem fellur betur að þörfum þeirra. Drög að framkvæmdaramma 2026-2029 gerir ráð fyrir húsnæðisframlagi af hálfu sveitarfélagsins í verkefni að þessum toga.



Samþykkt samhljóða.


10. Samstarf um uppbyggingu íbúðarhúsnæðis í Bjargslandi
1912083

Farið yfir stöðuna á samstarfsverkefni í tengslum við uppbyggingu íbúðarhúsnæðis í Bjargslandi.

Byggðarráð felur sveitarstjóra að rýna reglur um úthlutun lóða, gjaldskrá gatnagerðargjalda og lóðarleigusamninga í tengslum við fyrirkomulag á úthlutun lóða í Bjargslandi II og gera tillögu að breytingu til sveitarstjórnar ef tilefni er til.



Samþykkt samhljóða.



Brynja Þorsteinsdóttir fór af fundi að afloknum þessum dagskrárlið.


11. Beiðni um niðurfellingu byggingarleyfisgjalda
2512017

Framlögð beiðni frá Golfklúbbi Borgarness um niðurfellingu byggingarleyfisgjalda.

Byggðarráð telur sér ekki fært að fella niður byggingarleyfisgjald enda ekki heimilt samkvæmt gjaldskrá byggingarleyfisgjalda. Sveitarstjóra falið að hafa samband við málsaðila.



Samþykkt samhljóða.



Sæmundur Óskarsson fór af fundi.


12. Beiðni um rekstrarstyrk 2026
2512016

Lögð fram beiðni Golfklúbbs Borgarness um áframhaldandi rekstrarstyrk fyrir árið 2026

Ekki er gert ráð fyrir sérstökum rekstrarstyrk til Golfklúbbs Borgarness í drögum að fjárhagsáætlun 2026 og er erindinu því hafnað. Byggðarráð er hins vegar reiðubúið til samstarfs við klúbbinn um umhirðu íþróttasvæða í tengslum við breytingu á samstarfssamningi við UMSB.



Samþykkt samhljóða.


13. Tilnefning frá byggðarráði til heiðurslauna listamanna
2512012

Allsherjar- og menntamálanefnd Alþingis hefur auglýst eftir tilnefningum til heiðurslauna listamanna. Byggðarráð Borgarbyggðar hefur sent tilnefningu í sínu nafni.

Byggðarráð Borgarbyggðar tilnefnir Pál Guðmundsson frá Húsafelli til heiðurslauna listamanna.Páll fæddist árið 1959 á Húsafelli. Hann lauk námi frá málaradeild Myndlista- og handíðaskóla Íslands 1981 og nam höggmyndalist við Listaháskólann í Köln 1985-86.

Páll ólst upp að Húsafelli, þar sem sem mætast skógur og hraun, lindár og jökulár, heimur trölla, huldufólks, dýra og manna. Páll flutti heim þegar námi lauk og hefur alla tíð síðan stundað list sína frá Húsafelli. Páll er fjölhæfur listamaður og hefur t.d. fengist við myndlist, höggmyndalist og hljóðfærasmíði.

Í samtals 45 ár hefur Páll hefur haldið fjölda einkasýninga og samsýninga með öðrum listamönnum og hann hefur verið viðfangsefni bóka og heimildarmynda. Liðlega 20 höggmyndir eftir Pál prýða garða og torg víða um heim og auk fjölda höggmynda í náttúrunni við Húsafell og nágrenni.

Páll er einn merkasti listamaður Íslands, einstakur og verk hans auðþekkjanleg. Þau eru órjúfanlega tengd íslenskri náttúru og sögulegri arfleifð. Þau endurspegla mikla virðingu fyrir landinu og djúpa næmni fyrir svipmyndum fólks og náttúru. Verk hans prýða almenningsrými, kirkjur, tónlistarhús og heimili. Verk hans eru hluti af sjálfsmynd þjóðarinnar og vefa saman sögu, nátttúru og mannlíf. Verk Páls eru heimur út af fyrir sig. Þannig er steinharpa Páls sjálfstæður hljóðheimur og dæmi um einstæða sköpunargáfu. Hún er listaverk og hljóðfæri sem getið hefur af sér samstarf við fremsta tónlistarfólk heims.

Þó verk Páls prýði söfn og torg víða um heim og hann sé öðrum íslenskum og alþjóðlegum listamönnum innblástur þá er Páll hógvær sveitamaður og náttúrubarn.

Páll er framúrskarandi frumkvöðull í listsköpun. Hann er fyrirmynd og innblástur sem á rætur sínar í landinu, sögunni og jörðinni.

Páll Guðmundsson á Húsafelli er verðugur heiðurslauna listamanna.


14. Krafa vegna verklauna
2512018

Lögð fram stefna frá Primis ehf. vegna verklauna í tengslum við gjaldþrotaskipti Lands og verks ehf.

Framlagt og felur byggarráð LEX lögmannsstofu að gæta hagsmuna sveitarfélagsins í málinu.



Samþykkt samhljóða.


15. Beiðni um undirskriftasöfnun v. aðalskipulags
2511022

Farið yfir stöðu málsins í framhaldi af góðu samtali á síðasta fundi byggðarráðs og frekari samskiptum við forsvarsmenn Sólar til framtíðar.

Byggðarráð hefur móttekið erindi frá Sól til framtíðar, sem sent er í framhaldi af umfjöllun á fundi samtakanna með byggðarráði þann 27. nóvember sl. Var meðal annars rætt á þeim fundi að mögulegt væri að taka út skýringakort sem ber heitið „Takmarkanir vegna vindorku 1 og 2 í því skyni að koma til móts við sjónarmið samtakanna þar sem þau töldu að kortið væri villandi þar sem ekki stæði til að nýta vindorku á skipulagstímanum. Byggðarráð bauðst til þess þar sem kortið er einungs til upplýsinga sbr. kafla 5.1 í forsenda og umhverfismatsskýrslu.

Í erindinu sem barst 4. desember frá samtökunum hafna þau boði sveitarfélagsins og árétta þá afstöðu samtakanna að fram fari íbúakosning að undangenginni undirskriftasöfnunar vegna vindorkuumfjöllunar í aðalskipulagi fyrir Borgarbyggð 2025-2037. Byggðarráð telur erindi Sólar til framtíðar afmarka skýrt að gerð er krafa um að fram fari undirskrifasöfnun í þeim tilgangi að umfjöllun um vindorkunýtingu verði tekin út úr greinargerð með aðalskipulagi 2025-2037.

Byggðarráð telur vera þann annmarka á erindi Sólar til framtíðar að sveitarfélaginu er skylt á grundvelli 10. gr. skipulagslaga nr. 123/2010 að fjalla í aðalskipulagi um áherslur þingsályktun um landsskipulagsstefnu 2024-2038. Í áherslum C.2 og C.3 í gildandi landsskipulagsstefnu er skýrt kveðið á um að skipulag skuli fela í sér stefnu um nýtingu vindorkuvera í sátt við umhverfi og samfélag.

Byggðarráð telur einnig að sjónarmið samtakanna Sólar til framtíðar séu samhljóma þeirri stefnu sem fram kemur í aðalskipulaginu 2025-2037 þar sem engin vindorkuver eru heimiluð á skipulagstímanum. En m.a. kemur fram á bls 14 í forsenda og umhverfismatsskýrslu aðalskipulagsins “Unnin var stefnumótun fyrir vindorku í sveitarfélaginu og er megin niðurstaða hennar að í aðalskipulagi skuli engin svæði afmörkuð fyrir vindorkuver. Sveitarfélagið mun taka ákvarðanir um vindorkuver þegar þau hafa verið sett í nýtingarflokk rammaáætlunar.“

Samkvæmt 3. gr. reglugerðar nr. 155/2013 um undirskriftasafnanir vegna almennra atkvæðagreiðslna samkvæmt sveitarstjórnarlögum skal sveitarstjórn meta hvort ákvæði 3. mgr. 108. gr. sveitarstjórnarlaga hamli því að unnt sé að krefjast almennrar atkvæðagreiðslu um málið og tilkynna ábyrgðaraðila um niðurstöðu sína. Í því tilviki sem hér er til umfjöllunar er það álit byggðarráðs að ekki séu forsendur til þess að hefja undirskriftasöfnun í þeim tilgangi að umfjöllun um vindorkunýtingu verði fjarlægð úr samþykktu aðalskipulagi fyrir Borgarbyggð 2025-2037.

í ljósi þess leggur byggðarráð til við sveitarstjórn að hafna beiðni Sólar til framtíðar um að safna undirskriftum í því skyni að fá umfjöllun um vindorkunýtingu fellda út úr greinargerð með aðalskipulagi sveitarfélagsins 2025-2037 sbr. 3. mgr. 108 gr. sveitarstjórnarlaga.

Unnt er að kæra þá ákvörðun sveitarstjórnar til innviðaráðuneytisins, sbr. 111. gr. sveitarstjórnarlaga.



Samþykkt samhljóða.


16. Umsókn um stofnframlag frá Nemendagörðum búvísindadeildar LBHÍ
2508106

Framlögð drög að svari til Nemendagarða Búvísindadeildar LBHÍ vegna beiðni um stofnframlag vegna byggingar nemendagarða á Hvanneyri.

Byggðarráð samþykkir að fela sveitarstjóra að svara erindi Nemendagarða Búvísindeildar LBHÍ með þeim hætti sem lagt er til.



Samþykkt samhljóða.


Fundi slitið - kl. 14:05