Sveitarstjórn Borgarbyggðar

1. Skýrsla sveitarstjóra

Sveitarstjóri flytur skýrslu sveitarstjóra

Sveitarstjóri flytur skýrslu sveitarstjóra

2. Ársreikningur Borgarbyggðar 2024

Afgreiðsla frá fundi 703. fundi byggðarráðs: "Drög að ársreikningi Borgarbyggðar fyrir árið 2024 lögð fram. Rekstur A-hluta Borgarbyggðar var gerður upp með 319 m.kr. afgangi á árinu 2024 en samstæða A- og B- hluta skilaði afgangi upp á 440 m.kr. Rekstrartekjur A-hluta námu 6.556 m.kr. og samstæðu 7.551 m.kr. og jukust um 10% milli ára. Hagnaður fyrir afskriftir (EBITDA) var 486 m.kr. af A-hluta og 773 m.kr. af samstæðu. Veltufé frá rekstri A-hluta var jákvætt um 668 m.kr. og handbært fé frá rekstri 728 m.kr. en samstæða Borgarbyggðar skilaði veltufé frá rekstri að fjárhæð 892 m.kr. og handbæru fé frá rekstri upp á 992 m.kr. Afkoma af rekstri er vel viðunandi og sjóðstreymi er sterkt sem endurspeglar góða fjárfestingargetu sveitarfélagsins. Afkoma af rekstri A-hluta er þó ívið lakari en árið áður og framlegð frá rekstri (EBITDA) var lægri en áætlað hafði verið, aðallega vegna meiri hækkunar á hreinum kostnaði við félagslega aðstoð en áætlað hafði verið. Á árinu 2024 fjárfesti sveitarfélagið í varanlegum rekstrarfjármunum fyrir 1.018 m.kr. og var stærsta fjárfestingin í endurbyggingu Grunnskóla Borgarfjarðar á Kleppjárnsreykjum. Öll fjárfesting var fjármögnuð með sjóðstreymi frá rekstri og handbæru fé og því án lántöku. Heildareignir A-hluta Borgarbyggðar voru í árslok 2024 bókfærðar á 10,2 ma.kr. og eignir samstæðu á 12,6 ma. Skuldir og skuldbindingar A-hluta námu 3,9 ma.kr. og samstæðu 5,8 ma.kr. Hreinar vaxtaberandi skuldir A-hluta (án lífeyrisskuldbindinga) voru í árslok um 1,4 ma.kr. Skuldaviðmið skv. fjárhagslegu viðmiði sveitarstjórnarlaga var 27% í árslok 2024 fyrir A-hluta og 35% fyrir A- og B-hluta saman sem endurspeglar hagstæða skuldastöðu og gott svigrúm til fjárfestingar. Byggðarráð samþykkir að vísa ársreikningi Borgarbyggðar fyrir árið 2024 til fyrri umræðu í sveitarstjórn. Samþykkt samhljóða."

Á fundinn mættu Halldóra Pálsdóttir frá KPMG og Haraldur Örn Reynisson og fóru yfir ársreikning Borgarbyggðar fyrir árið 2024.



Lögð er fram tillaga að vísa ársreikningi Borgarbyggðar 2024 til seinni umræðu í sveitarstjórn.



Samþykkt samhljóða



Davíð Sigurðsson lagði fram eftirfarandi bókun fyrir hönd meirhluta sveitarstjórnar B lista: Rekstur Borgarbyggðar gekk vel á árinu 2024 og heilbrigður afgangur var af rekstri. Samtals var fjárfest fyrir 1,0 ma.kr. og ekki hefur áður verið fjárfest jafn mikið af hálfu sveitarfélagsins. Sjóðstreymi frá rekstri var sterkt og því tókst að fjárfesta án þess að ráðast í lántöku.

Skuldastaða Borgarbyggðar er með hagstæðasta móti samanborið við önnur sveitarfélög. Skuldaviðmið samstæðu Borgarbyggðar er 35% samanborið við 150% lögbundið hámark en meðaltal í landinu upp á 109%. Sveitarfélagið er því afar vel í stakk búið til að halda áfram á braut uppbyggingar.

Það er íbúum, og öðrum sem leið eiga um sveitarfélagið, ljóst að framkvæmdatímabil er hafið. Okkar stærsta fjárfesting á liðnu ári var í endurbyggingu á húsnæði Grunnskóla Borgarfjarðar á Kleppjárnsreykjum og er sú framkvæmd vel á veg komin. Verulega var fjárfest í skólahúsnæði á Varmalandi vegna færslu leikskólans Hraunborgar frá Bifröst að Varmalandi. Þar að auki hefur verið fjárfest umtalsvert í gatnagerð og gangstígum.

Mikið líf hefur færst í uppbyggingu húsnæðis í sveitarfélaginu. Brákarhlíð og Nemendagarðar MB byggja fyrir námsmenn og eldra fólk. Fjölbýlishús rísa í Borgarnesi, sérbýli á Hvanneyri og innan skamms verða auglýstar lóðir til úthlutunar í nýju hverfi í Bjargslandi. Framkvæmdir við nýtt fjölnota íþróttahús eru hafnar og í sumar verður lokið við endurbætur í Grunnskólanum í Borgarnesi. Gert er ráð fyrir að hefja kennslu í nýrri byggingu á Kleppjárnsreykjum fyrir áramót og í sumar verða framkvæmdir við götur og stíga, ásamt því að hafist verður handa við lýsingu frá hesthúsahverfinu í Borgarnesi upp að Einkunnum. Framundan er tímabil framkvæmda og uppskeru.

Rekstur Borgarbyggðar gengur vel, en það eru blikur á lofti. Eins og ársreikningurinn ber með sér er veruleg undirliggjandi hækkun á kostnaði við félagsþjónustu. Kostnaðarþátttaka ríkisins í málaflokknum var minni en áætlað var og mun draga enn frekar úr henni á yfirstandandi ári. Þá munu kjarasamningar kennara leiða til hækkunar á rektrarkostnaði. Loks er ástæða til að hafa áhyggjur af þróun heimsmála.

Byggðarráð hefur ákveðið að ráðast í markvissa vinnu við að rýna fjárhag sveitarfélagsins til að styrkja enn frekar sjálfbærni í rekstri. Mun afrakstur þeirrar vinnu verða kynntur áður en vinna við fjárhagsáætlun 2026 hefst.

Á árinu 2024 var ákveðið að fjárfesta í félagsþjónustu sveitarfélagsins, bætt var í viðhald gatna og annarra mannvirkja, breytingar gerðar á skólamálum, rekstur slökkviliðs, félagslegra íbúða, ljósleiðara og sorpþjónustu tekinn til sérstakrar skoðunar svo dæmi séu tekin. Markmiðin heilt yfir þessa vinnu voru að bæta eða samræma þjónustu og fara betur með fjármuni sveitarfélagsins.

Tilefni er til að vekja sérstaka athygli á afkomu af sorpþjónustu sveitarfélagsins. Vegna mikils hallareksturs og skuldasöfnunar undanfarin ár var ráðist í víðtækar aðgerðir bæði á tekju- og kostnaðarhlið ásamt því að íbúar voru hvattir til dáða í flokkun úrgangs. Þær aðgerðir hafa skilað betri árangri en við þorðum að vona og afkoma í málaflokknum var jákvæð um 51 m.kr. Að hluta skýrist árangurinn af hærri greiðslum frá Úrvinnslusjóði en gert var ráð fyrir, sem koma til vegna betri flokkunar en ekki síst vegna þeirra aðhaldsaðgerða sem höfðu meiri áhrif en reiknað var með. Þessi árangur leiðir til þess að greitt hefur verið inn á skuld málaflokksins við sveitarsjóð. Þessi árangur leiðir einnig til þess að hægt verður að horfa til lækkunar gjaldskrár sorpþjónustu í sveitarfélaginu. Því ber að fagna.

Að lokum er rétt að koma á framfæri þökkum til starfsmanna og stjórnenda innan sveitarfélagsins fyrir þeirra hlut í þeim árangri sem náðst hefur í rekstri sveitarfélagsins.





Ragnhildur Eva lagði fram eftirfarandi bókun fyrir hönd fulltrúa D lista í sveitarstjórn: Fulltrúar sjálfstæðisflokksins í sveitarstjórn Borgarbyggðar lýsa yfir ánægju með rekstrarniðurstöðu Borgarbyggðar fyrir árið 2024. Niðurstaðan sýnir sterkan rekstur og góða fjárhagsstöðu sem tryggir sveitarfélaginu burði til að bæta sína innviði, halda uppi góðri þjónustu við íbúa sveitarfélagsins og möguleika á að lækka álögur á íbúa án þess að það hefði veruleg áhrif á rekstur sveitarfélagsins.



Til máls tóku: DS og REJ

3. Viðauki við fjárhagsáætlun 2025

Afgreiðsla frá 703. fundi byggðarráðs: "Byggðarráð samþykkir framlagðan viðauka við fjárhagsáætlun 2025. Í honum felst hækkun á hreinum á rekstrarkostnaði upp á samtals 106,6 m.kr. Þar vega þyngst hrein kostnaðaráhrif af nýjum kjarasamningi við Kennarasamband Íslands. Samþykkt er hækkun á framkvæmda- og fjárfestingaáætlun að fjárhæð 21,2 m.kr. vegna búnaðarkaupa í Grunnskólanum í Borgarnesi að fjárhæð 16,2 m.kr. og Haukagilsgirðingar að fjárhæð 5,0 m.kr. Samþykkt samhljóða og vísað til fullnaðarafgreiðslu í sveitarstjórn."

Sveitarstjórn samþykkir viðauka I við fjárhagsáætlun 2025. Í honum felst hækkun á hreinum á rekstrarkostnaði upp á samtals 106,3 m.kr. Þar vega þyngst hrein kostnaðaráhrif af nýjum kjarasamningi við Kennarasamband Íslands. Samþykkt er hækkun á framkvæmda- og fjárfestingaáætlun að fjárhæð 21,2 m.kr. vegna búnaðarkaupa í Grunnskólanum í Borgarnesi að fjárhæð 16,2 m.kr. og Haukagilsgirðingar að fjárhæð 5,0 m.kr.



Samþykkt samhljóða

4. Lántaka hjá Lánasjóði sveitarfélaga 2025

Afgreiðsla frá 703. fundi byggðarráðs: "Framlagt en umsóknin er nú til umfjöllunar hjá Lánasjóði sveitarfélaga en í umsókninni felst að lántaka vegna seinni hluta framkvæmda við endurnýjun húsnæðis GBF á Kleppjárnsreykjum og byggingar fjölnota íþróttahúss - knatthúss í Borgarnesi. Samtals er gert ráð fyrir að lántaka Borgarbyggðar hjá Lánasjóði sveitarfélaga verði 2,0 ma.kr. á árinu 2025."

Sveitarstjórn smþykkir að taka lán hjá Lánasjóði sveitarfélaga að fjárhæð 2,0 ma.kr. á árinu 2025 vegna seinni hluta framkvæmda við endurnýjun húsnæðis GBF á Kleppjárnsreykjum og byggingar fjölnota íþróttahúss í Borgarnesi. Þau fela í sér að vera verkefni sem hafa almenna efnahagslega þýðingu, sbr. 3. gr. laga um stofnun opinbers hlutafélags um Lánasjóð sveitarfélaga nr. 150/2006.



Sveitarstjórnin samþykkir að til tryggingar láninu (höfuðstól, uppgreiðslugjaldi auk vaxta, dráttarvaxta og kostnaðar), standa tekjur sveitarfélagsins, sbr. heimild í 2. mgr. 68. gr. sveitarstjórnarlaga nr. 138/2011, nánar tiltekið útsvarstekjum sínum og framlögum til sveitarfélagsins úr Jöfnunarsjóði sveitarfélaga.



Jafnframt er Stefáni Brodda Guðjónssyni, kt. 230771-4649, sveitarstjóra Borgarbyggðar veitt fullt og ótakmarkað umboð til þess f.h. Borgarbyggðar að undirrita lánssamning við Lánasjóð sveitarfélaga sbr. framangreint, sem og til þess að móttaka, undirrita og gefa út, og afhenda hvers kyns skjöl, fyrirmæli og tilkynningar, sem tengjast lántöku þessari, þ.m.t. beiðni um útborgun láns.



Áformað er að lántakan fari fram í skrefum sem samræmast fjárþörf sveitarfélagsins.



Samþykkt samhljóða

5. Gjaldskrár 2025

Framlögð tillaga að uppfærðri gjaldskrá fyrir félagsheimili í Borgarbyggð.

Sveitarstjórn staðfestir uppfærða gjaldskrá félagsheimila í Borgarbyggð 2025 og felur sveitarstjóra að birta gjaldskránna.



Samþykkt samhljóða

6. Kosningar í ráð og nefndir 2022-2026

Lagt er til að Birgir Andrésson verði aðalmaður í byggingarnefnd íþróttamannvirkja og að Sigurður Guðmundsson verði varamaður hans.

Sveitarstjórn staðfestir að Birgir Andrésson verði skipaður aðalmaður og Sigurður Guðmundsson varamaður í byggingarnefnd íþróttamannvirkja.



Samþykkt samhljóða

7. Aðalskipulag - Endurskoðun - Vinnslutími

Skipulags- og byggingarnefnd leggur til við sveitarstjórn að tillögu að Aðalskipulagi Borgarbyggðar 2025-2037, með þeim lagfæringum sem gerðar hafa verið í kjölfar kynningar, verði vísað í auglýsingu í samræmi við 31. gr. skipulagslaga, að undangenginni athugun Skipulagsstofnunar sbr. 3. mgr. 30. gr. sömu laga.

Sveitarstjórn vísar tillögu að Aðalskipulagi Borgarbyggðar 2025-2037 vísar, með þeim lagfæringum sem gerðar hafa verið í kjölfar kynningar, til auglýsingar skv. 31. gr. skipulagslaga nr. 123/2010, að undangenginni athugun Skipulagsstofnunar sbr. 3. mgr. 30. gr. sömu laga.



Samþykkt samhljóða



Til máls tók: DS og KÁM

8. Snjómokstursreglur í dreifbýli

Umhverfis- og landbúnaðarnefnd samþykkir fyrir sitt leiti nýjar snjómokstursreglur í dreifbýli og leggur til við sveitarstjórn að staðfesta þær.

Sveitarstjórn staðfestir snjómokstursreglur í dreifbýli 2025 og felur sveitarstjóra að birta reglurnar.



Samþykkt samhljóða

9. Brákarbraut 25, gamla sláturhúsið - áætlun um niðurrif

Afgreiðsla frá 703. fundi byggðarráðs: "Byggðarráð samþykkir að ganga að tilboði Ó.K. Gámaþjónusta - sorphirðu ehf. að öllum skilyrðum uppfylltum og vísar til staðfestingar í sveitarstjórn. Samþykkt með tveimur atkvæðum (DS og GLE). Einn fulltrúi (REJ) sat hjá við afgreiðslu. Bókun REJ: Þar sem mikilvæg gögn um málið bárust ekki á tilsettum tíma situr fulltrúi Sjálfstæðisflokksins hjá við afgreiðslu þessa máls."

Sveitarstjórn staðfestir að gengið verði að tilboði Ó.K. Gámaþjónustu - sorphirðu ehf. um niðurrif á Brákarbraut 25, gamla sláturhúsinu, að öllum skilyrðum uppfylltum.



Ragnhildur Eva Jónsdóttir lagði fram eftirfarandi bókun fyrir hönd fulltrúa D- lista í sveitarstjórn: Það er skilningur fulltrúa Sjálfstæðisflokksins í Byggðaráði að í framhaldi af fundi Byggðaráðs þann 27. mars hafi átt að leita lögfræðiálits á næstu skrefum vegna útoðs niðurrifs í eyjunni og leggja fyrir næsta fund Byggðaráðs þann 3. apríl. Þegar frestur um framlagningu gagna fyrir þann fund rann út kom í ljós að ekkert lögfræðiálit lá fyrir. Á Byggðarráðsfundinum 3. apríl kl 11, eftir að fundur hafði staðið í rúmar tvær klukkustundir, barst síðan lögfræðiálit á stöðu málsins, þar sem fram kom að óskað hefði verið eftir því áliti seinnipartinn 2. apríl eða um það bil 13 klukkustundum fyrir Byggðarráðsfundinn.

Vert er að minna á það að gögn vegna funda skulu berast 48 klukkustundum fyrir fund.

Þetta mál telst þess eðlis að kjörnir fulltrúar þurfa að fá tíma til að kynna sér málið og þau gögn sem eiga að fylgja málinu. Aðdragandi þessa máls og hvernig á því var haldið er algjörlega óásættanlegt að mati fulltrúa Sjálfstæðisflokksins. Þessi vinnubrögð af hálfu sveitarfélagsins eru óvönduð og ekki boðleg þeim fulltrúum sem síðan byggja ákvarðanir á fyrirliggjandi gögnum. Af þessum ástæðum situr fulltrúi sjálfstæðisflokksins hjá undir þessum lið.



Samþykkt með 7 atkvæðum (EMJ, GLE, DS, EÓT, LS, SÓ, TDH) tveir sitja hjá (REJ og KÁM)



Til máls tók: REJ, SBG, DS, REJ, REJ

10. Snjómokstur í dreifbýli- Útboð 2025

Afgreiðsla frá 703. fundi byggðarráðs: "Byggðarráð samþykkir framlögð útboðsgögn og vísar til sveitarstjórnar. Samþykkt samhljóða."

Sveitarstjórn samþykkir framlögð útboðsgögn vegna snjómoksturs í dreifbýli og felur sveitarstjóra að vinna málið áfram.



Samþykkt samhljóða

11. Endurbætur á miðálmu Grunnskólans í Borgarnesi

Afgreiðsla frá 703. fundi byggðarráðs: "Byggðarráð staðfestir riftun á samningi við Land og verk ehf. 510914-0230 um framkvæmdir við endurbætur á húsnæði Grunnskólans í Borgarnesi. Verkinu hefur miðað hægt og er langt á eftir áætlun. Stefnt er að því að vinna hefjist á ný sem fyrst og mun vonandi ljúka í sumar. Grunnskólinn í Borgarnesi er stærsti vinnustaður sveitarfélagsins en um 340 börn eru við nám við skólann og starfsfólk ríflega 70 talsins. Þau eru beðin velvirðingar á þeim töfum sem orðið hafa og um leið þakkað fyrir skilninginn og æðruleysið. Samþykkt samhljóða."

Sveitarstjórn staðfestir riftun á samningi við Land og verk ehf. 510914-0230 um framkvæmdir við endurbætur á húsnæði Grunnskólans í Borgarnesi.



Samþykkt samhljóða



Ragnhildur Eva Jónsdóttir leggur fram eftirfarandi bókun fyrir hönd fulltrúa D-lista í sveitarstjórn: Þó að fulltrúi sjálfstæðisflokksins hafi hér fyrr á fundi hrósað fyrir vel rekið sveitarfélag síðasta árið, þá er þess virði að við staldra við og athuga hvort ekki sé hægt að gera betur.

Þetta verkefni er annað verkefnið á stuttum tíma sem ekki gengur eftir, hvort sem um ræðir fjárhagslegar áætlanir, tímalegar áætlanir eða verktakaval. Því er nauðsynlegt að velta fyrir sér hvers vegna það reynist sveitarfélaginu svona gríðarlega erfitt að ná þeim markmiðum sem sett eru og fara eftir þeim áætlunum sem samþykktar eru.

Í desember á síðasta ári lýsti minnihlutinn áhyggjum yfir því að meirihlutinn og kerfið réði ekki við stjórnun framkvæmdaverkefna og kostnaðar þeirra. Þar væri um er að ræða mikið áhyggjuefni þar sem fjárfestingaráform meirihlutans eru gríðarleg og mörg verkefni voru opin á þessum tíma.

Framkvæmdir sveitarfélagsins fara alla jafna langt fram úr kostnaði, það ílengist í þeim tímaramma sem samið hefur verið um eða áreiðanleikakönnun á verktökum hefur ekki farið fram sem skildi. Þetta er mjög miður og vil ég brýna mitt samstarfsfólk, meirihlutann, í að leggja á sig enn frekari vinnu til að hafa aga og eftirlit á framkvæmdum sveitarfélagsins okkur öllum til hagsbóta.





Til máls tóku: EÓT, SBG, REJ og DS

12. Uppbygging í Borgarbyggð - kynningar- og markaðsmál

Afgreiðsla frá 703. fundi byggðarráðs: "Byggðarráð samþykkir framlagt samkomulag við Onno ehf. og vísar til fullnaðarafgreiðslu í sveitarstjórn. Samþykkt samhljóða."

Sveitarstjórn staðfestir framlagt samkomulag við Onno ehf. dags. 13. 03. 2025. enda rúmast kostnaður innan fjárheimilda ársins.



Samþykkt samhljóða

13. Sparkvöllur á Hvanneyri - ástand og erindi um endurbætur

Afgreiðsla fundar byggðarráðs Borgarbyggðar frá fundi nr. 702: "Farið yfir ástand sparkvallar á Hvanneyri. Til fundarins koma Sonja Lind Eyglóardóttir starfandi íþrótta- og tómstundafulltrúi og Kristinn Óskar Sigmundsson forstöðumaður íþróttamannvirkja.



Byggðarráð tekur undir með íbúum á Hvanneyri að tímabært er að endurnýja gervigrasvöllinn á Hvanneyri. Hann er mikið notaður í frístundum, íþróttastarfi og leik barna í tengslum við skólastarf. Kynnt var ítarleg kostnaðaráætlun, lögð fram tillaga að fyrirkomulagi endurbóta. Ljóst er að völlurinn [liggur] undir skemmdum ef ekki verður brugðist við.

Sveitarstjóra falið að láta ráðast í endurnýjun vallarins á þeim grundvelli enda rúmast hún innan fjárheimilda.

Samþykkt samhljóða."

Sveitarstjórn staðfestir að ráðist verði í endurnýjun á sparkvellinum á Hvanneyri á yfirstandandi ári enda rúmast framkvæmdin innan fjárheimilda ársins.



Samþykkt samhljóða

14. Uppbygging íþróttamannvirkja í Borgarbyggð

Afgreiðasla frá fundi byggðarráðs Borgarbyggðar nr. 702: "Búið er að taka fyrstu skóflustungu að nýju fjölnota íþróttahúsi í Borgarnesi og framkvæmdir að hefjast. Verkefni byggingarnefndar íþróttamannvirkja halda þó áfram og framundan er undirbúningur að stækkun íþróttamiðstöðvarinnar í Borgarnesi.



Byggðarráð fagnar því að framkvæmdir eru nú hafnar við nýtt fjölnota íþróttahús í Borgarnesi. Áætlað er að byggingu hússins verði lokið haustið 2026. Þó svo framkvæmdir séu hafnar við fjölnota húsið þá er verkefnum byggingarnefndar íþróttamannvirkja ekki lokið. Áætlað er að hefja næsta áfanga uppbyggingar íþróttamannvirkja en í honum felst stækkun á íþróttamiðstöðinni í Borgarnesi með nýjum íþróttasal. Byggðarráð felur byggingarnefnd íþróttamannvirkja að hefja undirbúning að hönnun og skipulagi á nýjum íþróttasal sem tengdur verður íþróttamiðstöðinni.

Samþykkt samhljóða.

Sonja og Kristinn fóru af fundi að afloknum þessum dagskrárlið."

Sveitarstjórn felur byggingarnefnd íþróttamannvirkja að hefja undirbúning að hönnun og skipulagi á nýjum íþróttasal sem tengdur verður íþróttamiðstöðinni í Borgarnesi.



Samþykkt samhljóða



Til máls tóku: EÓT og KÁM

15. Framtíð Hamarsbæjarins

Afgreiðsla frá fundi byggðarráðs Borgarbyggðar nr. 702: Í samræmi við afgreiðslu frá fundi byggðarráðs Borgarbyggðar nr. 690 hefur átt sér stað samtal við Golfklúbb Borgarness um framtíð Hamarsbæjarins. Íbúðarhúsið að Hamri er í eigu Borgarbyggðar en Golfklúbbur Borgarness er með húsið á leigu samkvæmt samningi frá árinu 2003. Sá samningur rennur út í árslok 2028. Lögð er fram tilllaga um að sveitarstjóra verði falið að leita tilboða í húsið og samhliða gera samkomulag við Golfklúbbinn um uppgjör á leigusamingi klúbbsins.



Byggðarráð felur sveitarstjóra að láta stofna sér lóð utan um Hamarsbæinn. Í framhaldinu verði unnið að samkomulagi við Golfklúbb Borgarness um uppgjör á samningi milli aðila. Sveitarstjóra er falið að kynna drög að auglýsingu um sölu hússins fyrir byggðarráði að því loknu.

Samþykkt samhljóða."

Sveitarstjórn staðfestir að stofnuð verði sér lóð utan um Hamarsbæinn og húsið síðan selt. Samhliða verður unnið að uppgjöri á samningi við Golfklúbb Borgarness. Sveitarstjóra falið að vinna málið áfram.



Samþykkt samhljóða

16. Hagsmunasamtök landeigenda vegna Holtavörðuheiðarlínu 1

Framlagt erindi stjórnar Hagsmunasamtaka landeigenda vegna Holtavörðuheiðarlínu 1 til sveitarstjórnar Borgarbyggðar.

Erindið framlagt



Sveitarstjórn Borgarbyggðar stendur heils hugar með landeigendum eins og öðrum íbúum í sveitarfélaginu. Að sama skapi hefur sveitarstjórn fullan skilning á mikilvægi þess að styrkja flutningskerfi raforku í landinu. Þessi tvö sjónarmið geta auðveldlega farið saman.

Framleiðsla og flutningur á raforku skapar mikil verðmæti fyrir íslenskt samfélag. Það er óviðunandi að sú verðmætasköpun sé á kostnað landeigenda á línuleið flutningsmannvirkja. Það er sanngirnismál að greitt sé eðlilegt verð fyrir það land sem tekið er undir slík mannvirki. Það verð hlýtur að taka mið af þeim skorðum sem línan setur á nýtingu landsins og þeim miklu verðmætum sem línunni er ætlað að skapa.

Þegar línuleið Holtavörðuheiðarlínu 1 kemur til afgreiðslu á vettvangi á sveitarstjórnar verður eðlilega horft til þess hvort sanngirni hafi verið gætt í viðskiptum við landeigendur í sveitarfélaginu og þeir gangi sáttir frá borði.



Samþykkt samhljóða



Til máls tók: REJ

17. Lagning jarðstrengja í Borgarbyggð 2025

Afgreiðsla frá 701. fundi byggðarráðs: "Byggðarráð fagnar mikilvægu og tímabæru átaki í að efla raforkuöryggi í sveitarfélaginu og þakkar gott samstarf við RARIK. Byggðarráð heimilar sveitarstjóra að undirrita framlagða samninga um Kárastaðaland og Kárastaðaland flugvöll en óskar eftir samtali við RARIK um strengleið í Hamarslandi og í landi Einkunna með samlegðaráhrif í huga. Samþykkt samhljóða."

Sveitarstjórn staðfestir framlagða samninga við RARIK ohf. vegna jarðstrengja vegna Hamars L135401, Kárastaðalands L210317, Einkunna L207461 og Kárastaðalands flugvöllur L192066 og felur sveitarstjóra að skrifa undir fyrir hönd sveitarfélagsins.



Samþykkt samhljóða

18. Fundir byggðarráðs og sveitarstjórnar á vormánuðum 2025

Afgreiðsla fundar byggðarráðs frá fundi nr. 702: Lögð fram tillaga um fyrirkomulag á fundum byggðarráðs Borgarbyggðar í dymbilviku og á vormánuðum.



Fimmtudagur er hefðbundinn fundardagur byggðarráðs. Nú á vormánuðum fellur fimmtudagur í nokkrum tilvikum á lögbundinn frídag. Byggðarráð samþykkir eftirfarandi frávik frá hefðbundnum fundardegi, að fundir verði 16. apríl, 25. apríl, 30. apríl og 28. maí.

Samþykkt samhljóða."

Sveitarstjórn staðfestir eftirfarandi fundi byggarráðs Borgarbyggðar vormánuði 2025, að fundað verði 16. apríl, 25. apríl, 30. apríl og 28. maí



Samþykkt samhljóða

19. Aðalfundur Lánasjóðs sveitarfélaga 2025

Afgreiðsla frá 701. fundi byggðarráðs: "Framlagt og byggðarráð felur Lilju Björgu Ágústsdóttur sviðsstjóra fjármála- og stjórnsýslusviðs að mæta á fundinn fyrir hönd sveitarfélagsins. Samþykkt samhljóða."

Sveitarstjórn staðfestir umboð Lilju Bjargar Ágústsdóttur, sviðsstjóra fármála- og stjórnsýslusviðs til að mæta á aðalfund Lánasjóðs sveitarfélaga 2025. Fundurinn fór fram 20. mars. sl.

20. Aðalfundur Reiðhallarinnar Vindási ehf.- 2025

Afgreiðsla frá 702. fundi byggðarráðs: "Framlagt og sveitarstjóra falið að mæta á fundinn fyrir hönd sveitarfélagsins. Samþykkt samhljóða."

Sveitarstjórn staðfestir umboð sveitarstjóra til að mæta á aðalfund Reiðhallarinnar Vindáss árið 2025 fyrir hönd sveitarfélagsins. Fundurinn fór fram 1. apríl sl.



Samþykkt samhljóða

21. Endurnýjun á fulltrúum í fulltrúaráði Háskólans á Bifröst

Afgreiðsla frá 702. fundi byggðarráðs: "Byggðarráð tilnefnir Thelmu Dögg Harðardóttir í fulltrúaráð Háskólans á Bifröst í stað Helga Eyleifs Þorvaldssonar en skipun hans rennur brátt út í samræmi við reglur. Byggðarráð staðfestir ennfremur að Guðveig Eyglóardóttir verði áfram varamaður í fulltrúaráði skólans. Samþykkt samhljóða."

Sveitarstjórn staðfestir tilnefningu á Thelmu Dögg Harðardóttur í fulltrúaráð Háskólans á Bifröst í stað Helga Eyleifs Þorvaldssonar. Guðveig Lind Eyglóardóttir verður áfram varmaður í fulltrúaráði skólans.



Samþykkt samhljóða

22. Aðalfundur Orkuveitu Reykjavíkur 2025

Afgreiðsla frá 703. fundi byggðarráðs: "Framlagt og mætir sveitarstjóri til aðalfundarins fyrir hönd sveitarfélagsins."

Sveitarstjórn staðfestir umboð sveitarstjóra til að mæta á aðalfund Orkuveitu Reykjavíkur árið 2025 fyrir hönd Borgarbyggðar. Fundurinn fer fram 11. apríl 2025.



Samþykkt samhljóða

23. Aðalfundur Menntaskóla Borgarfjarðar 2025

Afgreiðsla frá 702. fundi byggðarráðs: "Framlagt og sveitarstjóra falið að mæta á fundinn fyrir hönd sveitarfélagsins. Samþykkt samhljóða."

Sveitarstjórn staðfestir umboð sveitarstjóra til að mæta aðalfund Menntaskóla Borgarfjarðar fyrir hönd sveitarfélagsins. Fundurinn fór fram 7. apríl sl.



Samþykkt samhhljóða

24. Aðalfundur Gleipnis 2025

Afgreiðsla frá 702. fundi byggðarráðs: "Framlagt og sveitarstjóra falið að mæta fundinn fyrir hönd sveitarfélagsins. Samþykkt samhljóða."

Sveitarstjórn staðfestir umboð sveitastjóra til að mæta á aðalfund Gleipnis fyrir hönd sveitarfélagsins. Fundurinn fór fram 31. mars. sl.





Samþykkt samhljóða

25. Byggðarráð Borgarbyggðar - 701

Fundargerð framlögð

26. Byggðarráð Borgarbyggðar - 702

Fundargerð framlögð

27. Byggðarráð Borgarbyggðar - 703

Fundargerð framlögð

28. Umhverfis- og landbúnaðarnefnd - 76

Fundargerð framlögð

29. Skipulags- og byggingarnefnd Borgarbyggðar - 75

Fundargerð framlögð