Í september var tekin ákvörðun um að loka fjórum kennslustofum sem staðsettar eru í miðálmu Grunnskólans í Borgarnesi vegna gruns um myglu. Til að gæta að öryggi nemenda og starfsfólks var ákveðið að hætta tafarlaust kennslu í umræddum stofum. Í kjölfarið voru tekin sýni og nú liggja fyrir bráðabirgðaniðurstöður. Frumskoðun sýnir að mygla er til staðar í tveimur af þeim fjórum stofum sem voru lokaðar, ásamt sameiginlegum rýmum meðfram umræddum stofum.

Stjórnendur sveitarfélagsins hafa fundað með sérfræðingum Eflu, Heilbrigðiseftirliti Vesturlands og sérfræðingi hjá Náttúrufræðistofnunar til að leggja mat á niðurstöðurnar og alvarleika þeirra. Í framhaldi af því var tekin ákvörðun um að loka alfarið rýmunum. Gert er ráð fyrir að þau verði lokuð þar til endanlegar niðurstöður liggja fyrir og nauðsynlegar endurbætur hafa farið farið fram.

Á komandi dögum verður unnið að því að endurskipuleggja starfsemi skólans með tillit til þessara stöðu, en ljóst er að það þarf að flytja kennslu bekkja í samráði við kennara og stjórnendur skólans. Sveitarfélagið mun leitast við að bregðast hratt við þessu ástandi sem nú er komið upp, tryggja tímabundin kennslurými og ráðast í endurbætur á milliálmu skólans.

Borgarbyggð þakkar aftur börnum, starfsfólki, foreldrum og forráðamönnum fyrir skilning og áfram verður unnið í sameiningu að vinna sem best úr erfiðum aðstæðum.