Veitur hófu jarðhitaleit við Borgarnes fyrr á þessu ári en þá voru boraðar rannsóknarholur rétt fyrir utan Borgarnes.
Til að fá skýrari mynd af jarðhita á svæðinu er fyrirhugað að bora á 11 stöðum til viðbótar. Borað verður bæði í Borgarnesi og rétt fyrir utan bæinn í landi sveitarfélagsins og við Borg á Mýrum.
Veitur reka hitaveitu sem þjónar Borgarbyggð og nærsveitum. Eftirspurn eftir heitu vatni eykst stöðugt í takt við fjölgun íbúa. Heita vatnið í hitaveitunni kemur í dag frá Deildartunguhver. Við leitum nú að viðbótar lághitaauðlindum á svæðinu til að auka aflgetu hitaveitunnar og bæta rekstraröryggi hennar.
Ástæðan fyrir því að við viljum rannsaka betur í nágrenni Borgarnes er að vísbendingar eru um að þar sé að finna jarðhita nýtanlegan til húshitunar og við viljum kanna það nánar.
Borun hverrar holu tekur að jafnaði einn til þrjá daga og leitast verður við að halda ónæði í lágmarki og tryggja öryggi. Þetta eru grannar holur sem ná niður á 60 til 100 m dýpi. Þær eru boraðar með léttum bortækjum á beltum svo ekki er þörf á vegagerð eða sérstökum borplönum. Búist er við að rannsóknirnar hefjist næstu daga.
Rannsóknarholur sem þessar eru svokallaðar hitastigulsholur og eru fyrsta skrefið í jarðhitaleit. Gögnin sem fást úr holunum gefa til kynna hvort frekari leit sé æskileg með tilliti til nýtingar í hitaveitu.
Nánari upplýsingar má finna hér
Jarðhitaleit Borganes
Tengdar fréttir

Framkvæmdir við Kveldúlfsgötu 24–30 að hefjast
Borgarbyggð vekur athygli á því að framkvæmdir eru að hefjast við fjölbýlishús að Kveldúlfsgötu 24–30 og aðliggjandi leiksvæði. Upphaf framkvæmda hefur tafist vegna ábendinga sem bárust við upphaf verksins sem teknar voru til skoðunar. Framkvæmdirnar fela meðal annars í sér úrbætur á umferðaröryggi, stígagerð, uppsetningu girðinga, hellulagnir og frágang á svæðinu. Áætlað er að verkið taki um þrjár vikur, en …

Borgarbyggð og Krabbameinsfélag Borgarfjarðar gera samstarfssamning
Borgarbyggð og Krabbameinsfélag Borgarfjarðar hafa skrifað undir samstarfssamning sem felur í sér að þeir íbúar sveitarfélagsins sem eru í krabbameinsmeðferð eða endurhæfingu fái frítt árskort í sundlaugar og íþróttamiðstöðvar Borgarbyggðar. Markmið samstarfsins er að styðja við og efla heilsu, vellíðan og lífsgæði fólks sem glímir við krabbamein og stuðla að auknum möguleikum til hreyfingar og endurhæfingar. Krabbameinsfélag Borgarfjarðar heldur utan …