Sveitarstjórn Borgarbyggðar

1. Skýrsla sveitarstjóra

Sveitarstjóri flytur skýrslu sveitarstjóra

Sveitarstjóri flytur skýrslu sveitarstjóra

2. Viðauki við fjárhagsáætlun 2025

Lagður fram viðauki V við fjárhagsáætlun 2025.

Lögð fram viðbót við viðauka V við fjárhagsáætlun 2025 en á fundum byggðarráðs nr. 723, 724 og 726 var vísað til sveitarstjórnar viðaukum eða viðbótum við viðauka við fjárhagsáætlun. Þeir fela þeir í sér eftirfarandi:

Hækkun fjárheimildar til annars vegar viðhalds gatna að fjárhæð 10,0 m.kr. og til viðhalds lóða að fjárhæð 2,3 m.kr. innan eignasjóðs. Fjárheimildin er annars vegar til að ráðast í endurbætur á því svæði sem tilheyrir atvinnusvæði við Melabraut á Hvanneyri og hins vegar endurbætur á bílastæði framan við slökkvistöðina við Sólbakka í Borgarnesi. Á móti þeim endurbótum er lagt til að viðhaldsliður í rekstri slökkviliðs verði lækkaður um 2,3 m.kr.

Þá er með viðaukanum uppfærð áætlun sem tengist breytingum á rauntölum 2024 og áætlunar sem var grunnur áætlunar 2025. Samtals eru áhrif þeirra á rekstraráætlun samstæðu jákvæð um 53,1 m.kr. sem skýrist af áhrifum samstarfsverkefna en um er að ræða reikningsleg áhrif af afskriftum og fjármagnsliðum. Vakin er athygli á því þessi liður hefur verið leiðréttur frá afgreiðslu byggðarráðs en í gögnum var villa er tengdist mati á afskriftum er tengjast eignarhlut sveitarfélagsins í Faxaflóahöfnum og tilheyra liðnum "samstarfsverkefni sveitarfélaga". Hrein áhrif á rekstrarniðurstöðu samstæðu af viðaukanum eru áætluð jákvæð um 43,1 m.kr.



Vísað er til sveitarstjórnar að gera þær beytingar á fjárfestingaráætlun að stofnaðir verði liðirnir Fráveita á Kleppjárnsreykjum og þar veitt fjárheimild að fjárhæð 45,0 m.kr. Bílastæði í Borgarnesi og þar veitt heimild að fjárhæð 5,1 m.kr. Þá verði hækkaður liðurinn Vallarás gatnaframkvæmdir um 11,0 m.kr. verði ákveðið að færa lagnir til að bæta þar með gæði atvinnulóða á svæðinu. Á móti færð 21,0 m.kr. til lækkunar á liðnum GBF á Kleppjárnsreykjum. Þessi lækkun tengist áðurnefndum endurbótum á fráveitu á Kleppjárnsreykjum m.a. sem tengist byggingum í eigu sveitarfélagsins. Brátt verður lokið við nýbyggingu við Grunnskóla Borgarfjarðar-Kleppjárnsreykjadeild og samhliða þeirri vinnu hefur verið farið í nauðsynlegar umbætur á fráveitu og brýnt að halda áfram þeirri vinnu. Þá er lækkaður rammi vegna stígagerðar í Borgarnesi um 28 m.kr.. Samanlögð áhrif eru til hækkunar á framkvæmdaáætlun um 12,0 m.kr.

Engin breyting er á áætluðum lántökum ársins en hækkun á handbæru fé A-hluta í árslok er áætluð 227,4 m.kr. og samstæðu 248,3 m.kr. sem skýrist að mestu af áðurnefndum breytingum á rauntölum 2024 og áætlun sem var grunnur áætlunar ársins 2025.



Sveitarstjórn samþykkir viðauka V við fjárhagsáætlun ársins 2025



Samþykkt samhljóða

3. Fjárhagsáætlun 2026

Afgreiðsla byggðarráðs frá fundi nr. 726:"Farið yfir stöðu vinnu við fjárhagsáætlun 2026. Til fundarins kemur Eiríkur Ólafsson fjármálastjóri.



Drög að áætlun um rekstur 2026 og fjárfestingar 2026-2029 rædd og kynnt. Lagt til að álagningarhlutfall útsvars verði óbreytt milli ára 14,97%. Drögum að fjárhagsáætlun er vísað til fyrri umræðu í sveitarstjórn sem fram fer 13. nóvember næst komandi og í framhaldinu til kynningar í sveitarstjórn Skorradalshrepps.







Samþykkt samhljóða."

Fjárhagsáætlun Borgarbyggðar fyrir árið 2026 sem lögð er fram til fyrri umræðu gerir ráð fyrir 234 m.kr. rekstrarafgangi af A-hluta og 178 m.kr. afgangi af rekstri samstæðu. Gert er ráð fyrir að framhald verði á heilbrigðri jákvæðri afkomu á komandi árum. Tekjur ársins 2026 í A-hluta eru áætlaðar 7.441 m.kr. sem er hækkun um 9,9% milli ára m.v. útkomuspá 2025. Áætlað er að skatttekjur (án framlags frá Jöfnunarsjóði) verði 4.430 m.kr. Miðað er við að útsvarsprósenta verði áfram 14,97% og álagningarhlutfall fasteignaskatts verði óbreytt milli ára. Áætlað er að framlag frá Jöfnunarsjóði sveitarfélaga verði 2.050 m.kr. og að aðrar rekstrartekjur verði 961 m.kr. Hagnaður fyrir afskriftir (EBITDA) er áætlaður 616 m.kr. árið 2026 sem samsvarar 8,3% af rekstrartekjum. Í sjóðstreymi er veltufé frá rekstri áætlað 727 m.kr. sem samsvarar 9,8% framlegð.

Rétt að vekja athygli á óvissu er tengist endurgreiðslum til ríkisins til sveitarfélagsins vegna fjárhagsaðstoðar við útlendinga. Í þessari fjárhagsáætlun er miðað við að endurgreiðslur fáist áfram. Verði það ekki raunin gætu aðrar rekstrartekjur orðið um 130 - 150 m.kr. lægri en ella og rekstrarniðurstaðan lakari sem því nemur.

Fjárfestingaráætlun ársins 2026 gerir ráð fyrir heildarfjárfestingu að fjárhæð 2,3 ma.kr. Stærstu verkefnin eru að ljúka við smíði á fjölnota íþróttahúsi í Borgarnesi og nýbygging við Ugluklett. M.v. fjárhagsáætlun 2026 munu heildareignir A-hluta Borgarbyggðar standa í 14,9 ma.kr. undir lok næsta árs. Bókfært eigið fé verður tæplega 6,6 ma.kr. og eiginfjárhlutfall því 44%. Heildarskuldir og skuldbindingar munu nema um 8,3 ma.kr.. M.v. fjárhagsáætlun sem hér er lögð fram til fyrri umræðu mun skuldaviðmið Borgarbyggðar standa í um 64% við lok árs 2025 og í um 83% í árslok 2026 og verða vel innan og skynsamlegra og lögbundinna marka.



Davíð Sigurðsson, framsóknarflokki (B.lista) lagði fram eftirfarandi bókun fyrir hönd meirihluta sveitarstjórnar:



Framsóknarflokkurinn í Borgarbyggð hefur á yfirstandandi kjörtímabili lagt áherslu á ábyrga fjármálastjórn, bætta þjónustu við íbúa, uppbyggingu í leik- og grunnskólum, íþróttaaðstöðu, gatnagerð, göngustígum ásamt þvi að fara í endurbætur á búnaði og umgjörð á fjölmörgum starfsstöðvum sveitarfélagsins. Þá höfum við unnið að eflingu atvinnulífs m.a. með auknu framboði á atvinnulóðum.

Stórátak hefur verið gert í skipulagsmálum á kjörtímabilinu með það að markmiði að fjölga íbúðareinginum. En frá 2022 hafa verið skipulagðar 95 íbúða einingar við Fjóluklett og Kveldúlfshöfða, 20 nýjar íbúðir við Kveldúlfsgötu og Þórðargötu í skipulagi Dílatanga, 2 íbúðir við Kvíaholt, 11 einbýlishúsalóðir og fjölbýlishúsalóð á Varmalandi ásamt 44 atvinnulóðum við Vallarás. Á árinu 2026 er svo fyrirsjáanlegt að fjöldi nýrra lóða muni verðatilbúnar til uppbyggingar, svo sem við Vallarás, Birkiklett, Fjóluklett, Kveldúlfshöfða og í Flatahverfi á Hvanneyri.

Á yfirstandandi ári hefur verið framkvæmt gríðarlega mikið í innviðum, það var farið í gatnaframkvæmdir við Vallarás, nýtt fjölnota íþróttahús í Borgarnesi reist, hönnunarvinna við stækkun leikskólans Ugluklett ásamt undirbúningi að nýju bílastæði við leikskólann, viðamiklar endurbætur miðálmu á Grunnskólanum í Borgarnesi, lýsingu á leið í Einkunnir, gatnaframkvæmdir við Sæunnargötu, lóðaframkvæmdir við Hraunborg á Varmalandi, nýbygging við grunnskóla Borgarfjarðar á Kleppjárnsreykjum, endurbætur á aðstöðu og búnaði í íþróttamiðstöðinni í Borgarnesi og í Safnahúsinu í Borgarnesi, endurbætur á aðstöðu og búnaði í félagsstarfi aldraðra, fráveituframkvæmdir á Kleppjárnsreykjum, stígagerð í Borgarnesi, endurbætur á Klettaborg og gerð sviðs í Skallagrímsgarði svo eitthvað sé nefnt.

Fjárfestingar Borgarbyggðar hafa verið í samræmi við þá áætlun sem Framsókn lagði upp með í upphafi kjörtímabilsins. Og hefur það endurspeglast í þeim áherslum sem hafa verið á fjárfestinga og framkvæmdaáætlun á yfirstandandi kjörtímabili eins og upptalning hér að framan sýnir fram á. Sú áætlun sem er hér lögð fram í dag endurspeglar áfram þær áherslur. Áfram er lögð áhersla á íþrótta- og æskulýðsmál, frekari þróun í skólamálum og að bætt verði í endurbætur á götum, götulýsingu og gangstéttum svo eitthvað sé nefnt.

Stærsta verkefni ársins 2026 er að ljúka við smíði á fjölnota íþróttahúsi í Borgarnesi. Næsta stórframkvæmd á vegum sveitarfélagsins er nýbygging við leikskólann Ugluklett. Undirbúningur gengur vel og gert ráð fyrir að útboðsgögn verði tilbúin fyrir árslok. Áfram er gert ráð fyrir fjárfestingu í stígum og göngu- og hjólastígs að Hamri hluti af þeim áformum er í samstarfi við Vegagerðina. Ráðist verður í átak í götulýsingu og LED-væðingu verður hraðað. Áfram verður unnið að framkvæmdum á skólahúsnæði við GBF á Kleppjárnsreykjum og er gert ráð fyrir nýframkvæmdum á skólalóð næsta sumar. Áfram verður lögð áhersla á endurbætur á íþróttamiðstöðinni og endurnýjun á rennibraut í sundlauginni í Borgarnesi samhliða vinnu við undirbúning að stækkun hússins.

Áætlun 2026 gerir ráð fyrir gatnaframkvæmdum við bæði Vallarás og Fjóluklett/Kveldúlfshöfða í Bjargslandi og framboði á nýjum lóðum í framhaldinu. Endurbyggingu á Bröttugötu og gatnaframkvæmdir við Borgarbraut í samstarfi við HVE og FSRE, endurbótum á leið sem liggur að Bjargi.

í framkvæmdaáætlun er áfram gert ráð fyrir ramma fyrir uppbyggingu sameiginlegrar miðstöðvar viðbragðsaðila, lögreglu og slökkviliðs.

Þá endurspeglast í fjárhagsáætlun að hafist verður handa við að gera úrbætur á upplýsingatækniumhverfi sveitarfélagsins með samræmingu, hagkvæmni og öryggi í huga.

Á árinu 2025 er gert ráð fyrir lántöku allt að 2 milljörðum króna og jafnframt er gert ráð fyrir lántöku á árinu 2026, en það er eðlilegt að skuldir aukist svolítið þegar farið er í jafn miklar framkvæmdir á innviðum og raun ber vitni, þó ber að geta þess að á árunum 2022-2024 var greitt talsvert niður af skuldum sveitarfélagsins samhliða þeirri uppbyggingu sem farið var í og er sveitarfélagið því vel í stakk búið til að takast á við þessar framkvæmdir, gert er ráð fyrir að skuldahlutfall sveitarfélagsins verði 83% í lok árs 2026 en það er talsvert undir 150% viðmiði sveitarstjórnarlaga og verður sveitarfélagið því ekki í neinum skilningi skilgreint sem mikið skuldsett.





Lagt er til að álagning útsvars á árinu 2026 verði 14,97% af tekjum.

Samþykkt samhljóða



Sveitarstjórn samþykkir að vísa fjárhagsáætlun ársins 2026 og fjárhagsramma fyrir árin 2027-2029 til seinni umræðu í sveitarstjórn og til kynningar í sveitarstjórn Skorradalshrepps.

Samþykkt samhljóða



Til máls tóku: SBG, SG, DS og EÓT

4. Fjárhagsáætlun Skorradalshrepps 2026 - til kynningar

Fjárhagsáætlun Skorradalshrepps 2026 lögð fram til kynningar.

Fjárhagsáætlun Skorradalshrepps 2026 ásamt fjárhagsramma fyrir árin 2027-2029 lögð fram.



Samþykkt samhljóða

5. Þjónustustefna Borgarbyggðar 2026

Stefna Borgarbyggðar um þjónustu og þjónustustig í byggðum og byggðarlögum sveitarfélagsins, sbr. 130. gr. a sveitarstjórnarlaga nr.138/2011, fyrir árin 2026-2029 lögð fram til fyrri umræðu í sveitarstjórn. Afgreiðsla frá fundi byggðarráðs nr. 724: Vinna við uppfærða þjónustustefnu Borgarbyggðar stendur yfir og í vikunni fóru fram íbúafundir í Lindartungu og í Landbúnaðarháskólanum á Hvanneyri.



Byggðarráð þakkar íbúum fyrir gott samtal og góðar ábendingar um þjónustustefnuna. Nú er unnið úr ábendingum og verður stefnan lögð fyrir næsta fund sveitarstjórnar til samþykktar. Íbúar geta áfram komið ábendingum á framfæri í gegnum borgarbyggd@borgarbyggd.is til 1. nóvember."

Sveitarstjórn samþykkir að vísa þjónustustefnu Borgarbyggðar fyrir árið 2026 til síðari umræðu í sveitarstjórn.



Samþykkt samhljóða

6. Umsókn um deiliskipulag - Baula

Afgreiðsla 80. fundar skipulags- og byggingarnefndar: "Skipulags- og byggingarnefnd leggur til við sveitarstjórn að samþykkja til auglýsingar tillögu að nýju deiliskipulagi fyrir þjónustusvæði Baulu. Lagður er fram uppdráttur dags. 22.10.2025. Deiliskipulag þetta samræmist gildandi aðalskipulagi. Málsmeðferð verður samkvæmt 41. gr. skipulagslaga nr. 123/2010. Samþykkt samhljóða"

Sveitarstjórn samþykkir framlagða tillögu að deiliskipulagi til auglýsingar. Lagður er fram uppdráttur dags. 22.10.2025. Málsmeðferð verður samkvæmt 41. gr. skipulagslaga 123/2010.



Samþykkt samhljóða

7. Umsókn um breytingu á deiliskipulagi

Afgreiðsla 80. fundar skipulags- og byggingarnefndar: "Skipulags- og byggingarnefnd leggur til við sveitarstjórn að samþykkja framlagða tillögu að breytingu á deiliskipulagi til auglýsingar. Lagður var fram uppdráttur dags. 20.10.2025. Breytingin er í samræmi við aðalskipulag Borgarbyggðar 2010-2022. Málsmeðferð verður samkvæmt 41. gr. skipulagslaga nr. 123/2010. Samþykkt samhljóða."

Sveitarstjórn samþykkir framlagða tillögu að deiliskipulagi Húsafelli 3 til auglýsingar. Lagður er fram uppdráttur dags. DAGS.20.10.2025. Málsmeðferð verður samkvæmt 41. gr. skipulagslaga 123/2010.





Samþykkt samhljóða

8. Brúartorg 6 - Umsókn um deiliskipulag

Afgreiðsla 80. fundar skipulags- og byggingarnefndar: "Skipulags- og byggingarnefnd telur að vegna staðsetningar lóðarinnar, við innkomu inn í Borgarnes frá suðri, þurfi að vinna enn frekar með landslagshönnun á lóðinni með tilliti til fegrunar umhverfisins. Skipulags- og byggingarnefnd felur skipulagsfulltrúa að vinna málið áfram með lóðarhöfum. Skipulags- og byggingarnefnd leggur til við sveitarstjórn að samþykkja framlagða tillögu að breytingu á deiliskipulagi til auglýsingar. Lagður er fram skipulagsuppdráttur, dags. 23.06.2025, ásamt skýringaruppdráttum. Málsmeðferð verður samkvæmt 41. gr. skipulagslaga nr. 123/2010. Samþykkt samhljóða."

Sveitarstjórn samþykkir framlagða tillögu að deiliskipulagi til auglýsingar. Lagður er fram uppdráttur dags. 23.06.2025. Málsmeðferð verður samkvæmt 41. gr. skipulagslaga 123/2010.



Samþykkt samhljóða

9. Umsögn-Sundabraut

Afgreiðsla 80. fundar skipulags- og byggingarnefndar: "
Skipulags- og byggingarnefnd felur skipulagsfulltrúa að skrifa umsögn fyrir hönd Borgarbyggðar og leggja fyrir sveitarstjórn. Samþykkt samhljóða."

Sveitarstjórn samþykkir framlagða umsögn vegna umhverfismats Sundabrautar og felur skipulagsfulltrúa að skila henni inn í skipulagsgátt Skipulagsstofnunar fyrir hönd Borgarbyggðar.

Sveitarstjórn tekur heils hugar undir þau sjónarmið sem koma fram í umsögn skipulagsfulltrúa og fagnar að kraftur hafi verið settur í Sundabraut. Matsskýrslan staðfestir að tilkoma Sundabrautar mun hafa mikil jákvæð áhrif á byggðaþróun og atvinnulíf í Borgarbyggð, á Vesturlandi og á landinu öllu.

Sveitarstjórn Borgarbyggðar tekur undir ályktun Haustþings Samtaka sveitarfélaga á Vesturlandi 29. október sl. um að mikilvægt er að nýta heimild í lögum um að Sundabraut verði samvinnuverkefni, og hún verði byggð upp í samræmi við áætlanir og undirritaða yfirlýsingu ríkis og borgar þar sem kemur fram að stefnt sé að því að framkvæmdir við Sundabraut geti hafist eigi síðar en 2026 og að brautin verði tekin í notkun árið 2031. Sveitarstjórn Borgarbyggðar hvetur til að hagkvæmasti kostur verði valinn svo framkvæmdin geti hafist sem fyrst.



Samþykkt samhljóða

10. Eigendafundur Orkuveitu Reykjavíkur 14. nóv 2025

Framlagt boð á eigendafund Orkuveitu Reykjavíkur sem fram fer 14. nóvember 2025.

Sveitarstjórn felur Stefáni Brodda Guðjónssyni, sveitarstjóra að mæta á eigendafund Orkuveitu Reykjavíkur fyrir hönd sveitarfélagsins.



Samþykkt samhljóða

11. Lántaka hjá Lánasjóði sveitarfélaga 2025

Afgreiðsla frá fundi byggðarráðs nr. 726: "Drög að samningum um langtímalántöku hjá Lánasjóði sveitarfélaga lagðir fram en ekki hefur verið endanlega gengið frá þeim hluta er snýr að vaxtakjörum. Byggðarráð felur sveitarstjóra að fullvinna og leggja fyrir sveitarstjórn til staðfestingar."

Sveitarstjórn Borgarbyggðar samþykkir hér með á sveitarstjórnarfundi eftirfarandi tvær lántökur hjá Lánasjóði sveitarfélaga samtals að útgreiðslufjárhæð samtals kr. 500.000.000,-

Samþykkt er lántaka að útgreiðslufjárhæð allt að kr. 250.000.000,- og höfuðstólsfjárhæð allt að kr. 294.484.780,- með lokagjalddaga þann 5. nóvember 2055, í samræmi við skilmála að lánasamningi sem liggja fyrir á fundinum og sem sveitarstjórnin hefur kynnt sér. Einnig er samþykkt að taka lán hjá Lánasjóði sveitarfélaga að höfuðstól allt að kr. 250.000.000,- með lokagjalddaga þann 20. febrúar 2039 í samræmi við skilmála að lánasamningi sem liggja fyrir á fundinum og sem sveitarstjórnin hefur kynnt sér.

Sveitarstjórnin samþykkir að til tryggingar lánunum (höfuðstólsfjárhæðinni, uppgreiðslugjaldi, auk vaxta, dráttarvaxta og kostnaðar), standa tekjur sveitarfélagsins, sbr. heimild í 2. mgr. 68. gr. sveitarstjórnarlaga nr. 138/2011, nánar tiltekið útsvarstekjum sínum og framlögum til sveitarfélagsins úr Jöfnunarsjóði sveitarfélaga.

Eru lánin tekin til að fjármagna endurbyggingu grunnskóla sveitarfélagsins á Kleppjárnsreykjum og byggingu fjölnota íþróttahúss í Borgarnesi sem felur í sér að vera verkefni sem hefur almenna efnahagslega þýðingu, sbr. 3. gr. laga um stofnun opinbers hlutafélags um Lánasjóð sveitarfélaga nr. 150/2006.

Jafnframt er Stefáni Brodda Guðjónssyni, sveitarstjóra, kt. 230771-4649, veitt fullt og ótakmarkað umboð til þess f.h. Borgarbyggðar að undirrita lánssamninga við Lánasjóð sveitarfélaga sbr. framangreint, sem og til þess að móttaka, undirrita og gefa út, og afhenda hvers kyns skjöl, fyrirmæli og tilkynningar, sem tengjast lántöku þessari, þ.m.t. beiðni um útborgun lána.



Samþykkt samhljóða



Til máls tók: SBG

12. Grunnskóli Borgarfjarðar- Kleppjárnsreykjadeild - framkvæmdir á skólahúsnæði

Framlögð eftirfarandi afgreiðsla sem samþykkt var samhljóða á fundibyggðarráðs nr. 726: "Tvö sambærileg tilboð bárust frá þjónustufyrirtækjum. Byggðarráð samþykkir tillögu um að gengið verði að tilboði frá Fastus að upphæð 11.390.347 kr. m/vsk. og vísar til gerðar viðauka við framkvæmdaáætlun."

Sveitarstjórn staðfestir að tekið verði tilboði frá Fastus að fjárhæð 11.390.347 kr. m/vsk.





Samþykkt samhljóða

13. Melabraut á Hvanneyri - staða og skipulag

Framlögð afgreiðsla frá fundi byggðarráðs nr. 726: "Byggðarráð samþykkir drög að viðauka og felur sveitarstjóra að fullvinna og leggja fyrir sveitarstjórn."

Sveitarstjórn staðfestir að farið verði í framkvæmdir við gatnagerð á Melabraut, Hvanneyri í samræmi við viðauka við leigusamning milli Borgarbyggðar og Landbúnaðarháskóla Íslands (2025) og hnitsett mæliblað dags. 03.11.2025. Fjárheimildir í verkefnið verði auknar um 10.000.000 kr. sbr. viðauka V.



Samþykkt samhljóða

14. Samstarf við Festi um uppbyggingu Brákareyjar

Framlögð undirrituð viljayfirlýsingu milli Festis og Borgarbyggðar varðandi skipulag og uppbyggingu í Brákarey sbr. afgreiðslu fundar byggðarráðs nr. 726. Þar samþykkti byggðarráð viljayfirlýsinguna og fól sveitarstjóra að undirrita með fyrirvara um fullnaðarafgreiðslu í sveitarstjórn.

Sveitarstjórn staðfestir framlagða viljayfirlýsingu við Festi um skipulag og uppbyggingu í Brákarey.

Samstarf við Festi um hugmynda- og skipulagsvinnu í Brákarey kom í framhaldi af ákvörðun sveitarfélagsins vorið 2022 að auglýsa eftir áhugasömum samstarfsaðilum um skipulagsmál og uppbyggingu í Brákarey.

Fyrstu tillögur að rammaskipulagi voru kynntar fyrir byggðarráði Borgarbyggðar og í kjölfarið fundað með fasteignaeigendum og rekstraraðilum í Brákarey. Niðurstöður voru svo kynntar fyrir íbúum og sveitarstjórn 2024 og í framhaldinu ráðist í gerð deiliskipulags byggt á þeim.

Nýtt aðalskipulag, sem samþykkt var til staðfestingar í síðasta mánuði, og nýtt deiliskipulag fyrir Brákarey, sem áætlað er að auglýsa eigi síðar en í mars, eru mikilvægar vörður á leið til uppbyggingar í Brákarey.

Nú þegar skipulagsvinna er langt komin er góður tímapunktur að undirstrika á ný sameiginlegan vilja Borgarbyggðar og Festis um að standa að uppbyggingu í Brákarey sem laðar að sér mannlíf og eykur lífsgæði íbúa.

Sveitarstjórn tekur vel í það markmið sem fram kemur í viljaýfirlýsingunni að hefja hönnun á endurmótaðri Brákarey í framhaldi nýju deiliskipulagi þannig að framkvæmdir gætu hafist á árinu 2027. Til að það verði að veruleika mun Borgarbyggð leggja sitt af mörkum til að innviðir sveitarfélagsins og innviðafélaga styðji við verkefnið.



Samþykkt samhljóða

15. Janus heilsuefling

Framlögð eftirfarandi afgreiðsla sem samþykkt var samhljóða á fundi byggðarráðs nr. 726: "Byggðarráð samþykkir tillögu Velferðarnefndar um að ganga til áframhaldandi samninga við Janus heilsueflingu og að valin verði þjónustuleið 1 og miðað við samning til tveggja ára."

Sveitarstjórn staðfestir ákvörðun velferðarnefndar um að ganga til áframhaldandi samninga við Janus heilsueflingu, miðað við þjónustuleið 1 og að samningurinn skuli vera til næstu tveggja ára. Sveitarstjóra falið að skrifa undir fyrir hönd sveitarfélagsins.



Samþykktir samhljóða

16. Endurskoðun á reglum um úthlutun lóða

Afgreiðsla frá fundi byggðarráðs Borgarbyggðar nr. 724: "Framlagt og byggðarráð samþykkir fyrir sitt leyti uppfærðan lóðarleigusamning og vísar til staðfestingar í sveitarstjórn."

Nýlega voru uppfærðar reglur um úthlutun lóða í Borgarbyggð og hafa lóðarleigusamningar verið uppfærðir m.t.t þeirra. Sveitarstjórn staðfestir uppfærða lóðarleigusamninga.



Samþykkt samhljóða

17. Stjórnsýslukæra_sameiningakosningar_2025- Mál IRN25090129

Afgreiðsla frá fundi byggðarráðs Borgarbyggðar nr. 725: "Framlagt. Byggðarráð er upplýst um efni þeirra kæra, og viðauka vegna þeirra, sem hafa borist og greinargerða sem hafa farið frá sveitarfélaginu þar sem veitt eru andsvör. Vísað til sveitarstjórnar."

Kærur ásamt viðaukum sem bárust vegna íbúakosninga um sameiningu Borgarbyggðar og Skorrdalshrepps lagðar fram ásamt svörum sveitarfélagsins. Sveitarstjórn staðfestir svör sveitarfélagsins vegna framkominna kæra og staðfestir umboð sveitarstjóra, forseta sveitarstjórnar og byggðarráðs til að svara fyrir hönd sveitarfélagsins og gæta hagsmuna þess, sérstaklega í ljósi þess að um flýtimeðferðarmál eru að ræða og því eru kærufrestir og svarfrestir afar skammir eða alveg niður í þrjá sólarhringa. Beðið er niðurstöðu Innviðaráðuneytisins vegna málanna.



Samþykkt samhljóða

18. Stjórnsýslukæra_sameiningakostningar_2025- Mál nr. IRN25090119

Afgreiðsla frá fundi byggðarráðs nr. 723: "Lögð fram stjórnsýslukæra vegna sameiningarkosninga 2025



Framlagt."

Kærur ásamt viðaukum sem bárust vegna íbúakosninga um sameiningu Borgarbyggðar og Skorrdalshrepps lagðar fram ásamt svörum sveitarfélagsins. Sveitarstjórn staðfestir svör sveitarfélagsins vegna framkominna kæra og staðfestir umboð sveitarstjóra, forseta sveitarstjórnar og byggðarráðs til að svara fyrir hönd sveitarfélagsins og gæta hagsmuna þess, sérstaklega í ljósi þess að um flýtimeðferðarmál eru að ræða og því eru kærufrestir og svarfrestir afar skammir eða alveg niður í þrjá sólarhringa. Beðið er niðurstöðu Innviðaráðuneytisins vegna málanna.



Samþykkt samhljóða

19. Umhverfisviðurkenningar 2025

Afgreiðsla frá fundi umhverfis- og landbúnaðarnefndar nr. 82:"Umhverfisviðurkenningar Borgarbyggðar 2025 veittar.



Eftirfarandi viðurkenningar voru veittar:



Snyrtilegt bændabýli 2024: Hvítárvellir í Andakíl



Falleg lóð við íbúðarhúsnæði: Kjartansgata 6



Snyrtileg lóð við atvinnuhúsnæði: Hótel Hamar



Sérstök viðurkenning fyrir snyrtilegt umhverfi:Pálstangi



Samfélagsviðurkenning umhverfis-og landbúnaðarnefndar: Jóhannes Ellertsson

Sveitarstjórn staðfestir ákvörðun Umhverfis- og landbúnaðarnefndar varðandi eftirfarandi viðurkenningar.



Snyrtilegt bændabýli 2024: Hvítárvellir í Andakíl



Falleg lóð við íbúðarhúsnæði: Kjartansgata 6



Snyrtileg lóð við atvinnuhúsnæði: Hótel Hamar



Sérstök viðurkenning fyrir snyrtilegt umhverfi:Pálstangi



Samfélagsviðurkenning umhverfis-og landbúnaðarnefndar: Jóhannes Ellertsson



Sveitarstjórn óskar þeim innilega til hamingju sem hlutu viðurkenningu og hvetur þau til áframhaldandi dáða.



Samþykkt samhljóða

20. Hreinsunarátök 2025

Afgreiðsla byggðarráðs frá fundi nr. 723: "Í samræmi við afgreiðslu á 80. fundi umhverfis- og landbúnaðarnefndar fór fram verðfyrirspurn um söfnun brotajárns. Fjögur tilboð bárust. Hagstæðasta tilboðið barst frá Hringrás. Umhverfis- og landbúnaðarnefnd leggur til við byggðarráð að fela starfsmanni að ganga til samninga við Hringrás, að uppfylltum skilmálum, á grundvelli þess. Áætlað er að söfnunin fari fram undir lok október og nóvember.



Byggðarráð staðfestir afgreiðslu umhverfis- og landbúnaðarnefndar. Tilboðið felur ekki í sér kostnað fyrir sveitarfélagið né íbúa þess.







Samþykkt samhljóða."

Sveitarstjórn staðfestir að gengið verði til samninga við Hringrás og felur sveitarstjóra að vinna málið áfram.



Samþykkt samhljóða

21. Snjómokstur í dreifbýli- Útboð 2025

Afgreiðsla frá fundi byggðarráðs nr. 723: " Í útboði fyrir vetrarþjónustu í Borgarbyggð nr. 2401233 bárust enginn tilboð í samningshluta 3 og 4 sem uppfylltu skilmála.



Samkvæmt lögum um opinber innkaup er heimilt að ganga til samningskaupa án undangenginnar auglýsingar, sbr. 39. gr. laganna. Þar kemur m.a. fram að heimilt sé að nýta þessa aðferð þegar:



a. Engin tilboð, engin fullnægjandi tilboð, engar tilkynningar um þátttöku eða engar fullnægjandi tilkynningar um þátttöku berast vegna almenns eða lokaðs útboðs, enda sé í endanlegum samningi ekki vikið í verulegum atriðum frá upphaflegum skilmálum útboðsgagna.



(Tilboð telst ekki fullnægjandi þegar það hefur ekki tengsl við samninginn og dugir bersýnilega ekki, án verulegra breytinga, til að mæta þörfum kaupanda eða kröfum eins og þær eru tilgreindar í útboðsgögnum.)



c. Innkaup eru algerlega nauðsynleg vegna aðkallandi neyðarástands sem stafar af ófyrirsjáanlegum atburðum og ekki er unnt að standa við fresti í almennu útboði, lokuðu útboði eða samkeppnisútboði.



Sendur var tölvupóstur á bjóðendur í útboðinu ásamt fleiri verktaka á svæðinu sem þóttu líklegir til að geta tekið verkið að sér.



Byggðaráð leggur til að gengið verði til samninga við Kaldólf ehf. kt. 420305-0440 og felur sveitastjóra að undirrita samning með fyrirvara um samþykki sveitastjórnar.







Samþykkt samhljóða."

Sveitarstjórn staðfestir að gengið verið til samninga við Kaldólf ehf. kt. 420305-0440 og felur sveitastjóra að undirrita samninginn.



Samþykkt samhljóða

22. Kæra nr. 119-2025, Mælimastur á Grjóthálsi

Afgreiðsla frá fundi byggðarráðs nr. 725: "Framlagður úrskurður Úrskurðarnefndar umhverfis- og auðlindamála í máli nr. 119/2025, þar sem kærð er ákvörðun sveitarstjórnar Borgarbyggðar frá 8. maí 2025 um að samþykkja nýtt deiliskipulag fyrir Grjótháls.



Úrskurður framlagður en niðurstaða hans er að kærumálinu er vísað frá úrskurðarnefndinni."

Lagður fram til kynningar úrskurður Úrskurðarnefndar umhverfis- og auðlindarmála í máli nr. 119/2025. Kærð var sú ákvörðun sveitarstjórnar Borgarbyggðar frá 8. maí 2025 um að samþykkja nýtt deiliskipulag fyrir Grjótháls. Málinu var vísað frá úrskurðarnefndinni.

23. Vallarás - hönnun og framkvæmdir

Afgreiðsla byggðarráðs frá fundi nr. 726:"Framlagt minnisblað verkefnastjóra um færslu lagna við Vallarás með það að markmiði að auka verðmæti lóða við Vallarás 5 og 5a.



Fyrir liggur uppfært kostnaðarmat sem felur talsverða lækkun frá fyrra kostnaðarmati. Þar með hafa forsendur breyst fyrir framkvæmdinni og kemur í veg fyrir að lóðunum fylgi kvöð vegna lagna. Byggðarráð samþykkir að vísa til sveitarstjórnar að stækka framkvæmdaverk vegna síðari áfanga Vallaráss um sem nemur kostnaði við færslu lagna við Vallarás 5 og 5a og felur sveitarstjóra að uppfæra viðauka V við framkvæmdaáætlun 2025.



Samþykkt samhljóða."

Sveitarstjórn staðfestir að stækka skuli framkvæmdarverk vegna síðari áfanga Vallaráss um sem nemur kostnaði við færslu lagna við Vallarás 5 og 5a, að fjárhæð 11.000.000 m.kr. til samræmis við viðauka V.



Samþykkt samhljóða

24. Háskólasamfélagið í Borgarbyggð - rannsóknir og nýsköpun á Hvanneyri

Framlögð umsögn Borgarbyggðar um mál drög að frumvarpi til laga um breytingu á lögum um opinbera háskóla, nr.25/2008 (háskólasamstæða).

Í Borgarbyggð eru starfandi tveir öflugir háskólar sem skara fram á úr hvor á sínu sviði; Háskólinn á Bifröst og Landbúnaðarháskóli Íslands. Skólarnir hafa átt með sér gott samstarf sem farið hefur vaxandi. Sveitarstjórn Borgarbyggðar styður eindregið hugmyndir um frekara samstarf skólanna. Það er mjög mikilvægt að lagaumhverfi háskóla styðji við en standi ekki í vegi fyrir slíku samstarfi, hvert sem það mun leiða.

Sveitarstjórn Borgarbyggðar hefur miklar áhyggjur af því að uppbygging opinbers háskólasamfélags á Íslandi miðist út frá Háskóla Íslands og í gegnum hann muni liggja allar línur uppbyggingar opinbers háskólastarfs.

Í frumvarpi til breytinga á lögum um opinbera háskóla er t.a.m. ljóst að eingöngu einn skóli getur orðið "flaggskipsháskóli" og það er Háskóli Íslands enda miðað við lágmarks nemendafjölda í 5.000 nemendum. Ekki er er horft til sérstöðu eða tiltekinna styrkleika, landfræðilegrar nándar eða tækifæra í rannsóknum svo eitthvað sé nefnt. Sveitarstjórn Borgarbyggðar óttast að með þessari lagabreytingu sé verið að rýra tækifæri og frumkvæði annarra skóla til að vaxa eða stökkva á ný tækifæri.

Sveitarstjórn Borgarbyggðar hvetur stjórnvöld eindregið til að efla báða háskólana í kennslu, rannsóknum og nýsköpun með áherslu á uppbyggingu á Hvanneyri.



Sveitarstjórn Borgarbyggðar samþykkir framlagða umsögn.



Samþykkt samhljóða

25. Umræða um stöðu leiðar 81

Vegagerðin hefur upplýst að til standi að leggja niður leið 81 í vor og skerða þjónustu strax frá áramótum. Leið 81 er hringleið almenningsvagna sem fer um Borgarfjörð síðdegis alla virka daga.

Sveitarstjórn Borgarbyggðar lýsir miklum vonbrigðum með þau áform að leggja niður leið 81 í vor og skerða þjónustu strax frá áramótum. Þau skilaboð eru mikið áfall. Þessi skilaboð byggja á þeirri ákvörðun að skerða framlag til almenningssamgangna í dreifbýli og verður þessi leið fyrir valinu vegna þess að hún er „innan sama sveitarfélags“. Ekki þarf að hafa mörg orð um það hversu mótsagnakennd þessi röksemd er í miðjum meðbyr með sameiningum sveitarfélaga.

Borgarbyggð hefur unnið ötullega að því að efla almenningssamgöngur m.a. með stuðningi úr byggðaáætlun og nú er allri þeirri vinnu stefnt í uppnám. Þessi vinna sem Borgarbyggð hefur lagt í til að bæta almenningssamgöngur hefur haft mjög góð áhrif á að tengja betur þéttbýli og dreifbýli og þá sérstaklega fyrir unga fólkið í sveitarfélaginu. Sífellt fleiri treysta á leið 81. Borgarbyggð hefur orðið til úr sameiningu 13 sveitarfélaga. Það er langt á milli á milli byggðakjarna en við berjumst við að þétta raðirnar, skapa samstöðu og kveða niður sundurlyndi. Okkar leið er fyrst og fremst að treysta á samgöngur! Svo sem að íbúar í dreifbýli geti stundað æfingar í íþróttamannvirkjum í Borgarnesi og öfugt. Að leggja niður eða skerða þjónustu á leið 81 setur stórt strik í reikning skóla, vinnustaða, íþrótta- og tómstundastarfs. Satt að segja hefur sveitarfélagið fremur verið að vona að af þessari leið fengist stuðningur í baráttu okkar við að bæta samgöngur við íbúa á Bifröst.

Þingmenn Norðvesturkjördæmis hafa verið upplýstir um þessa afstöðu sveitarfélagsisns og bindur sveitarstjórn vonir við að þessum áformum verði hnekkt.



Samþykkt samhljóða



Til máls tóku: REJ, SG, SÓ og EÓT

26. Vatnsrennibraut við sundlaug í Borgarnesi

Á fundi 722. fundi byggðarráðs var kynnt úttekt á stöðu rennibrauta við sundlaugina í Borgarnesi. Lagðir voru fram valkostir um viðgerð á núverandi rennibrautum eða kaup á nýjum. Erindinu var vísað til vinnu við fjárhagsáætlun. Í kjölfar þeirrar vinnu er lagt til við sveitarstjórn að fela sveitarstjóra að láta fara fram verðfyrirspurn um endurnýjun á rennibrautum sundlaugarinnar í Borgarnesi.

Sveitarstjórn ákveður að það fram fari verðfyrirspurn um endurnýjun á rennibrautum fyrir sundlaugina í Borgarnesi. Eftir að búið var að rýna málið nánar er ljóst að verkið rúmast innan fjárheimilda íþróttamiðstöðvarinnar í Borgarnesi fyrir yfirstandandi ár. Sveitarstjóra falið að vinna málið áfram.



Samþykkt samhljóða

27. Farsældarráð Vesturlands

Afrgeiðsla frá fundi velferðarnefndar nr. 165: " Farsældarráð Vesturlands mótar aðgerðaáætlun til fjögurra ára sem byggir á stefnu stjórnvalda um farsæld barna, niðurstöðum farsældarþings og stöðumats á Vesturlandi. Áætlunin skal endurspegla svæðisbundar áskoranir og tækifæri og skilgreina skýr markmið, aðgerðir, tímaramma, mælikvarða um árangur og ábyrgðaraðila. Meðfylgjandi eru drög að skipulagi ráðsins sem og erindisbréfi. Gert er ráð fyrir tveimur kjörnum fulltrúum, tveimur til vara og einum stjórnanda frá Borgarbyggð og er því óskað eftir tilnefningum inn í ráðið.



Velferðarnefnd leggur til að Guðveig Eyglóardóttir og Kristján Ágúst Magnússon séu aðalmenn í samráðshópnum, Eðvar Ólafur Traustason og Bjarey Lárudóttir Bjarnadóttir séu varamenn, ásamt félagsmálastjóra í Borgarbyggð."

Sveitarstjórn staðfestir að Guðveig Eyglóardóttir og Kristján Ágúst Magnússon verði aðalmenn í farsældarráði Vesturlands. Varamenn þeirra eru Eðvar Ólafur Traustason og Bjarney Lárudóttir Bjarnadóttir. Að stjórnandinn verði Erla Björg Kristjánsdóttir félagsmálastjóri.



Samþykkt samhljóða

28. Byggðarráð Borgarbyggðar - 723

Fundargerð framlögð

29. Byggðarráð Borgarbyggðar - 724

Fundargerð framlögð

30. Byggðarráð Borgarbyggðar - 725

Fundargerð framlögð

31. Byggðarráð Borgarbyggðar - 726

Fundargerð framlögð

32. Skipulags- og byggingarnefnd Borgarbyggðar - 80

Fundargerð framlögð

33. Umhverfis- og landbúnaðarnefnd - 82

Fundargerð framlögð

34. Fræðslunefnd Borgarbyggðar - 246

Fundargerð framlögð



Til máls tók REJ um lið 3 í fundargerð

Til máls tók SÓ um lið 3 í fundargerð

Til máls tók EÓT um lið 3 í fundargerð

35. Velferðarnefnd Borgarbyggðar - 165

Fundargerð framlögð