Lilja Björg, sviðsstjóri fjármála- og stjórnsýslusviðs og Viktor Ingi, verkefnastjóri upplýsinga- og kynningarmála heimsóttu nýverið ungmenni í Borgarbyggð þar sem þau kynntu Borgarbyggð, þau verkefni sem sveitarfélagið sinnir, stjórnsýslu og stafræna vegferð sveitarfélagsins. Meginástæða heimsóknanna var að kynna hugmyndasamkeppni meðal ungmenna sveitarfélagsins um nafn og útlit á nýjum starfsmanni Borgarbyggðar sem tekinn var til starfa á síðasta ári.

Starfsmaðurinn sem um ræðir er stafrænt vinnuafl sem mun gegna mikilvægu hlutverki við að auka sjálfvirkni og skilvirkni í þjónustu Borgarbyggðar. Verkefni stafræna vinnuaflsins eru meðal annars afstemming lánadrottna og kröfuvöktun en fleiri verkefni eru í þróun.

Með tilkomu stafræna vinnuaflsins stígum við stórt skref í átt að bættri þjónustu við íbúa og betra starfsumhverfi starfsmanna.

Heimsóknirnar fóru fram í Grunnskólanum í Borgarnesi, Grunnskóla Borgarfjarðar og Menntaskóla Borgarfjarðar, þar sem ungmennum sveitarfélagsins gafst tækifæri til að fræðast um sveitarfélagið og taka virkan þátt í að móta auðkenni eða logo fyrir nýjan stafrænan starfsmann.

Einstaklega gaman var að hitta ungmennin, heyra hugmyndir þeirra og finna fyrir mikilli sköpunargleði enda einstaklega efnilegur hópur sem við eigum hérna í sveitarfélaginu.

Við hlökkum til að sjá hugmyndir þeirra blómstra og þeirra þáttöku við að þróa verkefnið með okkur.