Þann 7. maí tók starfsfólk í leikskólanum Uglukletti þátt í ráðstefnu vegna þróunar- og rannsóknarverkefnisins Stilla – Hæglæti í skólastarfi.

Ugluklettur hefur verið þátttakandi í verkefninu undanfarin þrjú ár í samstarfi við fræðimenn frá Háskóla Íslands, Háskólanum á Akureyri og erlendum samstarfsaðilum. Verkefnið byggir á nánu samstarfi við vettvang og sameinar rannsóknir og þróunarstarf. Markmið ráðstefnunnar var að miðla niðurstöðum verkefnisins og að opna fyrir víðtækari umræðu um tíma, gæði og fagmennsku í leikskólastarfi.

Á ráðstefnunni komu saman bæði alþjóðlegir fræðimenn og starfandi leikskólakennarar til að varpa ljósi á hæglæti í leikskólastarfi frá ólíkum sjónarhornum. Meðal fyrirlesara er Alison Clark höfundur bókarinnar Slow knowledge and the unhurried child, sem fjallar um hæglátt leikskólastarf og fræðimenn sem tengja hæglæti við forystu, tengsl og daglegt starf í leikskólum.
Þá kynna íslenskir leikskólar eigin reynslu af þróunarverkefninu Stilla, þar sem hæglæti hefur verið innleitt í daglegt starf en eru það fjórir leikskólar talsins.
Þær Þær Dröfn Traustadóttir og Hugrún Lukka Guðbrandsdóttir fluttu erindi fyrir hönd Uglukletts og fjölluðu þær um reynslu þeirra af verkefninu ásamt þeim breytingar sem hafa orðið á starfsháttum leikskólans og hvernig hugmyndir hæglætis hafa mótað fagvitund starfsmanna.
Það sem ber hæst eru niðurstöður verkefnisins um að hæglæti sé fagleg og siðferðileg afstaða sem hefur áhrif á samskipti, skipulag og menningu leikskóla. Niðurstöðurnar sýna meðal annars að þegar börn fá meiri tíma og rými eykst sjálfstjórn þeirra, félagsfærni og sköpun og leikur þeirra verður dýpri og merkingarbærari.

Hæglæti í leikskólastarfi
Hæglæti snýst í grunninn um að finna „réttan takt“ í starfi með börnum, ekki of hraðan, en heldur ekki of hægan. Í hefðbundnu leikskólastarfi getur klukkan og skipulagið oft ráðið ferðinni, en rannsóknir sýna að slíkt getur dregið úr flæði, sjálfræði og þátttöku barna.
Hæglátt leikskólastarf leggur áherslu á að gefa börnum tíma til að sökkva sér í leik og könnun, hlusta á áhuga þeirra og fylgja honum og skapa samfellu í námi og tengslum. Þegar það tekst verður til meira jafnvægi í starfinu, meiri ró og sterkari tengsl milli barna og fullorðinna. Hæglæti er því leið til að efla gæði, vellíðan og lýðræðislega þátttöku barna í daglegu starfi.