Átak gegn útbreiðslu kerfils í Borgarbyggð

Borgarbyggð hvetur íbúa til að taka höndum saman í sameiginlegu átaki til að stemma stigu við ört vaxandi útbreiðslu kerfils í héraðinu. Á undanförnum árum hefur kerfill dreift sér hratt um svæði í sveitarfélaginu og víða náð fótfestu þar sem hann skyggir á og ryður burt náttúrulegum gróðri. Kerfillinn dreifir sér bæði með fræjum og rótarskotum og getur myndað stórar breiður sem erfitt er að uppræta ef ekki er gripið til samstilltra aðgerða.

Á sumum svæðum innan sveitarfélagsins er útbreiðslan orðin það mikil að hætta er á að kerfill verði ráðandi tegund ef ekkert er að gert.

Sveitarfélagið hvetur íbúa, landeigendur og bændur til að fylgjast vel með kerfli í sínu nærumhverfi og grípa til aðgerða þar sem hann er að byrja að festa rætur. Mikilvægt er að kippa upp stökum plöntum og slá stærri breiður áður en fræmyndun hefst, en kerfillinn er á þessum tíma árs að undirbúa dreifingu fræja. Átak að vor skilar enn betri árangri, þar sem auðveldast er að uppræta plöntuna snemma sumars.

Borgarbyggð og áhaldahús munu áfram sinna eyðingu kerfils eftir bestu getu á svæðum heyra undir Borgarbyggð.